Trede pennad

Genre
Théâtre
Langue
Breton
Source
Morlaix, A. Le Gloaziou, 1903
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

GWENVAR, EVEN, AR MANAC’H ha KRABAN goude 

AR MANAC’H berr war e c’horre 
Hon Salver d’ho mirout, an eil hag egile ! 

GWENVAR 
Ha c’hwi, va zad ! gwall bres ’c’heus lakaet da vale ? 
Gant poultrenn ha c’hwezenn eo labezet ho tal. 

AR MANAC’H 
O ! mar gallfe, kont veur, donet du-mañ raktal 
Un ugent pe dregont dimeus ho soudarded, 
’Vefe torfedoù bras ha gwalleurioù harzet : 
Bremazon, ’kreiz ma oa ar menec’h o pediñ, 
’Tegouezhas er chapel ur bagad divroidi. 
Pennoù du ha spontus, mouezhioù spontusoc’h c’hoazh, 
En o daouarn ruz-gwad pezhioù klezeier noazh : 
P’am eus gwel’t a stagent ar re all gant kerden, 
Me oa o son ar c’hloc’h, ’zo deut ’n ur redadenn, 
Evit goulenn sikour enep al lankoned, 
A ve graet deus oute, ’gav din, an Normaned. 

KRABAN oc’h erruout a-daol 
An tan, aotrounez kaezh, an tan er manati ! 

AR MANAC’H o taoulinañ 
Va Doue, deus ho torn ni ’rank atav sentiñ, 
Forzh pe wall pe eurvad a daol war hon gorre ; 
Na lezit ket, ’velkent, da drec’hiñ war ho re 
An dud fall dislonket gant an Diaoul er vro-mañ. 

GWENVAR 
N’hallomp ober netra, va zad, evit bremañ 
’Met risklañ en aner buhez brezelourien ; 
Hepdale ’teuio deomp keloù gant va mibien. 
Ar manac’h a sav, hag a chom kroazet e zivrec’h. 

EVEN 
Setu-mañ, plom a-walc’h, an dud yaouank distro. 

Kraban a za kuit.