V Pennad

Genre
Théâtre
Langue
Breton
Source
Brest, Moulerezh ar C’hourrier, 1906
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

TREMEUR, ARMEL, TALIESIN

TALIESIN d’an daoulin dirak Tremeur
Me eo, me eo, Tremeur, an ene paour-se !
Betek ennout eo bet douget, dre urzh Doue,
Va c’hlemmoù pa edon bremaik, e-kreiz an noz,
Pleget va chouk dindan n’ouzon peseurt mallozh !
Met divec’hiet ’on holl o selaou trouz da vouezh :
Eus ar mallozh warnon ne santan mui ar pouezh ;
Hag a seblant din kaout bremañ ’vel divaskell,
Da alan o c’hwezhañ enno ’vel un avel,
Un avel da’m dibrad da nijal, drant ha skañv,
Da nijal ’n ur ganañ ’vel laboused an hañv !

TREMEUR
Met piv ’out-te, va breur ?

TALIESIN
                                              Hel lavaret am eus,
Me eo an ene paour, ene hor bro, a teus
E-kreiz an noz teñval klevet oc’h hirvoudiñ !
Gant an Drouized edon betek-henn o pediñ,
Doueoù an derv bras ; met va c’halon pell zo,
A-nebeudoù, en em zistage anezho,
O c’hedal ur gredenn dousoc’h d’an eneoù,
Hag un Doue gwelloc’h eget o doueoù !
Ya, Breizh holl, dre va mouezh, eo a yoa o c’hervel
Un Doue all evit he miret da vervel !
Gant an nebeud komzoù am eus klevet ganit
Kement a zo ennon gant nerzh ha joa a drid ;
Rak en da gomzoù c’hwek va spered a dañva
Saour ar wirionez evit ar wech kentañ !…
Met tec’h, ha tec’h buan eus al lec’h euzhus-mañ !
Eus da spiañ a zo tud bleizi dre amañ ;
Soudarded zo kuzhet a bep tu dre ar c’hoad,
Mall ganto war ar maen aze skuilhañ da c’hwad !
Deus ha heul ac’hanon dre ur riboul distro,
Me ’c’hellfe da ziframm eus a skilf ar marv !
Met deus buan ; bremaik e vezo diwezhad !

TREMEUR
O va breur, bennozh dit ’vit da avizoù mat !…
Met eus al lec’hioù-mañ, perak ’klaskfen tec’hel,
Ma int bet merket din gant Doue da vervel ?…
Pa vin taolet warnout, na mouk ha blod a vi,
O daol-maen vras digriz, bremaik da’m izili ;
Na skedus ’vi bremaik da zaoulagad Jezuz,
Pa ziruilho warnout a-boulloù va gwad ruz !

TALIESIN
Petra a c’hell rentañ ken dous dit ar marv ?
Bev kentoc’h da vezañ silvidigezh ar Vro !
Bev, pa’z eus en da c’hwad nerzh da zifenn hor Breizh,
Pa strink eus da c’henoù evel sked gouloù deiz,
Pa bar da spered fur ’vel un heol a lugern,
Ma tridan dirazout, holl, spered hag eskern !
Siwazh, ha ret a vez a ve mouget kerkent
Ar gouloù a groge da barañ war va hent ?
O ! dre druez ouzhin, hag ur meur a vil all
A red, heñvel ouzhin, dre an noz, ’vel tud dall,
Den yaouank, ne’z ez ket d’en em reiñ d’ar marv,
A-raok ma vo dre-holl, o parañ war ar Vro,
Ar sklêrijenn dinamm a santan eus da greiz,
’Vel eus un heol divin, o sevel war Bro Vreizh !

TREMEUR
Ya, sklêrijenn divin war bro Vreizh a baro !…
N’eo ket eus va buhez, breur, met eus va marv
A strinko dre an neñv ar sklêrijenn divin !
Me eo ar goumoulenn a weler da vintin
Dirak an heol evit e viret da barañ :
Teuzet ar goumoulenn, hag an deiz a sklêra ;
Pa vo teuzet ivez mogedenn va buhez,
Neuze eo a savo war Breizh un deiz nevez ;
Neuze va zad Gildas, gant e vouezh entanet,
A c’hwezho feiz Jezuz e-kreiz ar Vretoned ;
Neuze, o drouiz yaouank, war da benn a weli,
Splann ha dudius holl, heol Jezuz o skediñ !

TALIESIN
Gildas ! Piv eo hennezh ?

ARMEL
                                              N’hen anavezez ket ?
Gildas eo nerzh Doue en hon touez, degaset
Da blegañ penn an holl dirak ar Groaz kristen ;
Selloù e zaoulagad zo ’vel div luc’hedenn,
E vouezh he deus galloud ar c’hu[du]run, pa groz ;
Kestell brezel a freuz dindan pouez e vallozh ;
E vantell, pa e zaol d’an avel war ar mor,
A gerzh evel ur vag gant he gouelioù digor.
Ha dre ar bed krouet n’eus galloud den na tra,
Pa sav Gildas e vrec’h, kement na rank plegañ.

TALIESIN
Hag e pelec’h e chom an den burzhudus-se ?

ARMEL
Emañ dre ar c’hoadoù en tu bennak aze !

TALIESIN
O Jezuz a c’halvan evit ar wech kentañ :
Va renit, me ho ped, dre an hent ar berrañ,
Evit ma c’hellin kaout, hag el lec’h-mañ degas
Da saveteiñ Tremeur, da servijer Gildas !

Fin an eil arvest