war don : Petra zo nevez e Kêr-Is ? 

  I 

Anaout a rit ? Piv na ra ket 
Margod ar big, a Gêr Biged, 
Ur gwrac’hig kromm ha barvegez, 
’Vel ma vi-te, Fant skignerez*.    [goapaerez] 

Hounnezh zo bet ur bompinenn*,    [bompinell] 
Ur plac’h a dan, mistr ha kempenn, 
Lemm a spered, lemm a lagad, 
Ha pennhêrez dreist ar marc’had. 

Faeüs e y-oa, ha faeüs bras ! 
« – Mar kemeran, ’mezi, ur gwaz, 
E rank kaout nerzh ha koantiri, 
Teod ur c’hloareg, stumm ur pipi. 

Ur galon domm hep botoù berr*,    [gwarizi] 
Reizh ha sentus e pep amzer ; 
A ouenn vat e ranko bezañ, 
Gant un tamm brav a beadra. » 

– Kement si vat ’rankje kavet, 
Si fall ebet pe netra c’hraet, 
Un den ’vel n’eus, na vo biken, 
Ael da huñvre, Madalen ! 

  II 

– Tostaat a ra paotred faro[d] 
D’ober askellig da Vargod, 
Tud a zanvez, – koant, – stummet mat, – 
Ar plac’h ne gav hini d’he grad. 

« – Atav ! Me dim’iñ d’ar seurt-se ! 
Trelatet ’int, sot-naet, ma feiz ! 
Sell Yann, gant e fri minaoued ; 
Fañch, an daoulagad dilavet ; 

Loeizig, ul logodenn vihan ; 
Job, ur geuneudenn dreut ha moan : 
Hemañ pladenn ’vel ul leue, 
Henhont ken feulz hag ur c’hole ! » 

  III 

– Pa oant skuizh oc’h huanadiñ, 
– ’Int skampet, – hini hag hini ; 
– Neuze ’tosta paotred teuskoc’h : 
Daou intañv loued, ur seller moc’h… 

Margod a ziroll da c’hoarzhin 
Gant neuzioù kroug, dirak o min. 
« – Ne lakain ket, – ac’hann da bell, 
– Spilhoù da goef Santez Katell. » 

  IV 

– An oad a zeu, ken’o gened ! 
He blev zo griz, he beg ridet, 
N’c’heller ket, siwazh ! neveziñ 
Beg ur plac’h kozh ’vel tal un ti. 

Ar melezour, ar c’hloc’h, bemdez, 
A lavar dezhi : « Dimez ! Dimez ! » 
Ar big a grog en he skouarn. 
Ho ! Mil bennozh d’an hent houarn ! 

Kavet he deus ur cheminod 
Tort, jilgamm, luch ha divalo, 
Ul lont[r]eg, paour evel ur razh, 
En em ginnig a rankas c’hoazh. 

  V 

– Penaos e kavit ar gentel, 
Merc’hed breuriezh Santez Katell ? 
Ha c’hwi, gwragez Cheminoded, 
’Peus ket a geuz d’ar Vretoned ? 

  da’m mignon Viktor Kresolles, e Kombrid