He marv santel
- Dedi
- Kinnig
- Kenvroiz ker eus Leon
- Annaig
- Son (1)
- Deus
- Son (2)
- War vor
- an Teodoù fall
- Hanternoz
- Egile
- Merzherez
- Anken
- He marv santel
- War an aod
- un Abardaez a viz Mae
- He boked diwezhañ
- He anv
- Amzer dremenet
- Tristidigezh
- ar Gwir vro
- Dilezet
- D’he ene
- Va-unan
- D’an dud hep kredenn
- Er vered
- Lireuenn he bez
- Goude va marv
- Da’m delenn
Nozvezh skrijus-meurbet ma welis o vervel
Va Dous muiañ-karet,
Evel ur gwall huñvre, da soñj a chomo pell
Em c’halon, gwriziennet.
En despet d’an holl boan a gemere noz-deiz
Ur medisin dispar,
Evit gallout herzel ouzh ar c’hleñved direizh
Ha n’en deus ket e bar,
Ar paz a yae war gresk ; ar glañvourez, siwazh !
Gant he foan a glemme,
Ha me ’yoa ’vel spontet, beuzet em glac’har vras,
E-harz troad he gwele.
Kerkent, er berr-alan, ur griadenn mouget
Da reiñ din an enkrez,
Ha me da dostaat ar gouloù, ’vit gwelet
Hag hi ’yoa c’hoazh e buhez.
He dremm a yoa gwenn-kann ; ar c’hwezenn a ruilhe
Diouzh he zal ivez gwenn ;
Kerent ha mignoned da zaoulinañ neuze,
’Vit ober ar bedenn.
Met evel pa vijen, en un taol, kouezhet dall,
Kentoc’h eget soublañ
Me da vont e kounnar ; c’hoant em boa da grial
Kement ha da ouelañ.
Eus va gwalleur, siwazh ! e welen ar vraster
Hag an deñvalijenn,
Rak eus va yaouankiz kement huñvreoù kaer
A nije da viken.
Koll a raen pep fiziañs, pa deuas, en ur mare,
He zerzhienn da vougañ ;
A-raok ur barr-amzer e weler, evel-se,
Amzer sioul da gentañ.
Kerkent, en un daoler he daoulagad warnon,
E lavaras gant feiz,
« War-laez, er Baradoz, em eus fiziañs, mignon,
D’en em welet un deiz ! »
Neuze me ’deuas mezhus da vezañ selaouet
Ar vouezh eus ar gounnar ;
Hep ar Relijion e soñjis n’ez eus ket
Netra vat war an douar.
Dihunet oa va feiz ; hag eus he chapeled
Me da ziskouez ar groaz
Da behini neuze, gant karantez meurbet,
Pell amzer e pokas.
En ur sellet ouzhin, hag ouzh kroaz ar Salver,
E varvas goustadik,
Laouen ’vel pa vije kousket hepken, seder,
Evel ur bugelig.
He chapeled ker, gant e groaz benniget,
A zo chomet ganen* ; [ganin]
Ra c’hallin, evelti, diouzh Satan diwallet,
Mervel e gwir gristen.