AN HEVELEP RE, IVONIG, AR PAN

IVONIG
An tan !

AN HOLL, souezhet
               An tan !

AR ROUZ
                               Pelec’h ?

IVONIG
                                               An tan a zo kouezhet
War lab va zad paeron hag en deus he losket.

NIKOLAZIG
Va Mestrez vat !…

AR PELIKARD
                                   Va Doue !

NIKOLAZIG
                                                      Petra ’sinifi
An dra-mañ c’hoazh ?

AR PELIKARD
                                          Va Doue !

AR PAN
                                                             Ne chom mui
Maen war vaen ; en un taol ez eo bet dismantret.

AR PERSON
Ha ! Setu ar c’hastiz ! N’eo ket bet daleet
Gwall bell da zont ha deut eo spontus. A-hent-all,
Ret e oa digeriñ daoulagad ar re zall.
Doue o c’hortoz c’hoazh a seblante bezañ
A-du gant an den kaezh a glaske hon tromplañ.

GARO, a-gostez
Al lab ! Mein ar chapel !…

da Ivonig

                                                 Penaos eo bet kroget
An tan enni, va mab ?

IVONIG
                                         Ni hon eus holl gwelet
Ur skod tan o kouezhañ eus an neñv.

AR PAN
                                                                     Sklêr e oa
An amzer ha dek eur tost e c’helle bezañ.
Komañs a raemp ’v’lato c’hweziñ dindan an heol
Ne oa na mogidell, nag arnev. En un taol,
Me ’sav va daoulagad hag a wel ur skod tan
O tiskenn a-ziouzhomp ; diskenn a rae ker buan
Hag ar stered a welomp o treuziñ an neñv
Ken lies gwech ma vez diboaniet un ene.
Kouezhañ ’reas war doenn al lab. Kerkent me ’wel
O sevel ar flamm bras ; n’oa ket ur mouch avel
Ha daoust da se, biskoazh, n’em eus gwelet, m’hen tou,
Nep lec’h un tan ker gwazh !

AR PERSON
                                                     Justis Doue, tudoù !
Splann eo ar merk ; n’oa nemet dek eur ; nag arnev,
Na mogidell ; an oabl digoc’henn ; ne grene
Ket un delienn ; ne welit ket emañ Doue
O skeiñ dizamant gant an hini ho tromple.
Sellit, an neñv ’n deus ’n em zigoret ; an tan
En deus devet al lab : ya — an dra — da gentañ,
Dont a ray tro an den war-lerc’h. O va Doue,
Ho pet truez ouzh ar pec’her aheurtet-se,
Grit dezhañ distreiñ diwar hent an ifern
Rak anez e vervo betek mel e eskern.

AR PAN
Ret eo lavaret evelkent, al lab hepken
A zo devet.

AR RE ALL
                     Al lab hepken.

AR PAN
                                                Ya, netra ken.
Nag ar plouz, nag ar greun a oa e-barzh, netra
N’eo bet devet a-hent-all.

GARO
                                                Ah ! Santez Anna
A zo deut da c’houlenn he mein…

AL LABOURERIEN
                                                               Ya, Aotroù, ya !

AR PELIKARD
Setu, Aotroù Garo, kompren a reomp bremañ…

AR PERSON
Deut eo kentoc’h, me ’gred, da reiñ deoc’h ur gentel
Gwazh a se deoc’h ma rit goap eus ho mamm santel.

Diwezh an trede arvest