MATEZH AR PERSON, NIKOLAZIG, AR PELIKARD, AR ROUZ, LEZULIT, BLOENNEG ha meur a hini all c’hoazh. Ar vatezh a ya hag a zeu en un ober he stal.

AR VATEZH
Nann, n’eus nemet ’n Aotroù Person er gêr, bremañ.

AR PELIKARD
Ha mat, Mari, c’hwi ’lavaro neuze dezhañ
Penaos ez eus amañ tud eus a Geranna
Ouzh her gortoz.

AR VATEZH
                                Amzer ho peus ?

AR PELIKARD
                                                               Pas re.

AR VATEZH
                                                                             Emañ
Er sal gant an Aotroù Garo.

AR PELIKARD
                                                  Hag an Aotroù
Kure, Mari, n’emañ ket er gêr ?

AR VATEZH
                                                         Nann, tudoù
Keizh, aet eo, n’eus ket pell, da welet an tad-kozh
Da Dreulan, chomet klañv, en un taol, dec’h da noz.

BLOENNEG
Che ! Her gwelet em boa c’hoazh, dilun, en Alre.

AR PELIKARD
Ar c’hleñvedoù a zeu, peurliesañ, ’vel-se,
Pa soñj, an nebeutañ, an den.

AR RE ALL
                                                      Ya, gwir mat eo.

AR VATEZH
Ne ’z eus den marv ’bet ganeoc’h ’velkent, du-se ?

LEZULIT
Nann, ’drugarez Doue.

AR VATEZH
                                           Me ’soñje marteze
Penaos ’vel ma’z oac’h deut amañ ken abred-se…

AR ROUZ
Nann ! Nann !

AR VATEZH
                           Deut ’oc’h da lakaat skrivañ ’n embannoù ?
Koulskoude ’mañ ket c’hoazh amzer an euredoù.

AR ROUZ
Tostaat a ra.

AR VATEZH
                         ’Vidon-me n’em eus mall ebet
D’e welet, ’tav ! An diaoul a veurlarjez, me ’bed
Lies a-walc’h ’vit ma kreñvo, met ne greñv ket.
Che !… An Aotroù Person, setu eñ o tonet
Gant an Aotroù Garo.

Mont a ra kuit.

LEZULIT, d’ar re all
                                      Bremañ e vo ret mat
Dezho digeriñ frank, pelloc’h, o daoulagad,
D’ar wirionez.