Perinaig (5)

Genre
Poésie
Langue
Breton
Source
Paris, J. Maisonneuve, 1898
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

              V 

          Hir an hent, hag an deiz zo berr ; 
          Bepred ’kerzh ar plac’hig skuizh-ker. 

          – Karrer, lâr din, en anv Doue ! 
          Hag emañ pell c’hoazh ma bro-me ?  – 

          Den na daol lagad war he zro, 
          Pa n’entent den yezh kozh he bro. 

          War guzh-heol bepred ar verc’hig 
          A gerzh, he botoù ’n he dornig, 

          Ha serret pep dor diragi : 
          – M’unanig ’on, lâr ouzh pep ti ; 

          Ur vignonez ’moa, ’deus devet, 
          Hag e-maez gante ’on taolet. – 

          Adarre war an hent didrouz ; 
          Na glev nemet mouezh ul labous, 

          ’Met ul labous o fipiat,     [pipial] 
          ’Vel en em gervel ’reont er c’hoad ; 

          Ha diaraok a nij ken skañv, 
          ’N ur geizañ flour, ’enep d’ar goañv, 

          ’Vel ’teskiñ ’n hent d’ar baourezig, 
          Ken ’soñj d’ene Perinaig. 

          – Perak en noz-mañ tremenet, 
          Sakrist, ar c’hloc’h-kañv zo klevet ? 

          – ’Vit ur baourez eo deus ar vro 
          Dindan ar porched kaout marv. 

          Hec’h-unan ’skoe ’n anaon, 
          Betek m’oe stipet ar varvskaon, 

          Div ’oant o vont, bloaz zo ouzhpenn : 
          Doue ’oar petra deut eben. – 

          Un dra burzhudus ’c’hoarvezas, 
          P’oe douaret ’kichen ar groaz : 

          Ur c’horf du-kañv a zo gwelet, 
          War ar bez ur plac’h astennet, 

          Ken obidoù zo graet neuze 
          D’eben ’michañs marv ivez. 

          Ab’oe ’klever en ivinenn, 
          ’Enep d’ar goañv daou evnig gwenn, 

          En o giz o kanañ seder 
          Gwerz Breizh-Izel, ’me ar c’hleuzier. 

          Evnigoù Breizh ’klever bemnoz 
          ’Tre ar mor glas ha Koad-an-Noz. 

              **** 

          Kenvroiz kaezh, ar c’heloù-mañ 
          Deoc’h eus a Bariz a gasan.