Perinaig (2)

Genre
Poésie
Langue
Breton
Source
Paris, J. Maisonneuve, 1898
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

              II 

          Daou chafod zo gwintet aze,  
          Keuneud a zo berniet etre ; 

          War ur chafod ’mañ ar barner, 
          Egile ’vit ar prezeger. 

          Ha tro-a-zro dre an dachenn 
          Nemet soudarded a-vandenn ; 

          Hag ur groz vras gant ar Saozon 
          O doc’hal : – Pegoulz ar pardon ? – 

          Degaset ’traoñ d’ar bern keuneud 
          Div verc’h a zo ken mistr ha treut, 

          Mistr ’vel an heizez er c’hoadoù 
          Ha treut-treutoc’h ’vit an Ankoù, 

          Ab’oe c’hwec’h miz krenn kastizet, 
          Ken oa truez ouzh o sellet : 

          Unan e du, da vervel reizh ; 
          Eben e gwenn, kañv ar werc’hez. 

          Pa stokas ouzh ar bern uhel, 
          ’Fazias evel ur bugel. 

          Ar Saozon ’lâre d’ar beleg : 
          – Prezeg anezhi, hast prezeg. – 

          – Abalamour d’ho pec’hedoù, 
          Perinaig, it d’ar marv ; 

          Heuilhet ganeoc’h ur sorserez… 
          – Me ’gav Janedig ur santez. – 

          Ar Saozon ’youc’he ’vel bleizi. 
          – Gwenn an erminig, emezi ; 

          Dinamm ’vel-se an erminig 
          ’On da Doue chomet koantig. – 

          Kaer o deus trubuilh da nec’hiñ, 
          Perinaig na lavar mui ; 

          Na mui n’selaou, pleget he fenn, 
          ’Vel ma vije ’n ur soñjadenn ; 

          ’N he lagadig glas an daeroù, 
          A-walc’h he c’halon keuz d’he bro. 

          Ur berr huñvre, berr huanad. 
          – Sammit, em’e, war ar bern koad. 

          Hag o tistreiñ d’he mignonez : 
          – Lâr evidon ur gan’enn kaezh. 

          ’N hini pep abardaez ’kanen, 
          Evit ma sikour da dremen. – 

          Ha div mouezhig a zo savet ; 
          Ha Perinaig zo klevet, 

          En ur bignal gant he c’halvar, 
          Kanañ dous klemmgan a c’hlac’har.