Pardon Sant Treveur

Genre
Poésie
Langue
Breton
Source
Paris, Sandoz et Fischbacher, 1880
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

  I 

Ran-tan-plan, ran-tan-plan. – Tud vat 
A-dalek ar Roc’h betek Prad, 

Eus a-berzh an aotrounez veur, 
Disul ’mañ pardon Sant-Treveur ; 

C’hoari e pep doare ’vo graet 
Nemet gourenoù na vo ket, 

Er bloaz-mañ na vo gourenoù, 
Se ’lak lazhadeg ’barzh ar vro. – 

Evel-se an tabouliner 
’Embanne e Roc’h d’ar gwener ; 

Hag o vousc’hoarzhin er marc’had 
Ar maeziad a rae serr-lagad. 

Ar sul war-lerc’h heol splann ’velkent 
Ha tud hag heol e-leizh an hent ; 

Dre ar pradoù war ar c’hlazenn 
Merc’hed, paotred hag archerien ; 

Ha ’c’hoarivas dre ar pradoù, 
M’hel lavar, nemet gourenoù ; 

Ha d’ar jabadao gant ar foultr 
’Deuent en-dro evel ar poultr : 

Ken ’oa mezv al lammerien, 
Ar binioù pe e berc’henn. 

Eus a Sant-Treveur daou-ha-daou 
’Distroent gant bleunioù ar gaou : 

Bleunioù hañv ouzh o zavañjer 
Hag en o c’halon ar gevier ; 

Berroc’h ’vit ar bleunioù, paotred, 
’Bado karantez ar merc’hed. 

  II 

Paotr ar gward ’goulenne emberr 
Tost d’an Ti-Poazh digant ur c’houer : 

– Ar maout-se pelec’h ’fell dit kas 
Ouzh e gernioù ruz-gwenn-ha-glaz. – 

– Evit un eured ’vo ret kaout 
Da bred warc’hoazh ur gaer a vaout. – 

– Da loenig n’a ket d’an eured, 
Da leur ’r pardon na lâran ket. – 

Da leur ’r pardon ’an marteze 
Ha mar karez dont ’weli se. – 

O tifourkañ da Sant-Treveur 
Un dinell oa en-dro d’al leur. 

Ha pevar dantad tan ouzhpenn 
’Pevar du d’ar gourenerien. 

Hou-hou, eme ar c’houer war ged 
Hou-hou evel ar Chouanted : 

Ha pa digorjont an dinell 
War benn paotr ar gward ul liñsel ; 

E-pad ar c’hannoù an den kaezh 
’Us d’ar chistr war e goazez reizh

Na klevet na rae na gwelet, 
Stoubenn e skouarn ha mouchet. 

Klevet na gwelet na fiñval, 
Hualet ’vel un aneval ; 

An deiz war-lerc’h, e-maez pa eas 
’Toull e dor e wreg her kavas. 

Difenn gourenoù d’ar Vreizhiz, 
Difenn d’ar person e iliz. 

Pa oe c’hoarvezet an dra-mañ, 
’Oan e Treger o studiañ. 

O studiañ ’oan er skolaj 
’Vit ober ma belegiaj ; 

Un den santel ’vijen-me bet, 
Hag ur plac’hig ’neus ma dalc’het.