an Ofer’n wenn

Genre
Poésie
Langue
Breton
Source
Paris, J. Maisonneuve, 1898
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

Houmañ zo un dra erru mat 
Etre Landreger ha Langoad ; 

Ken gwir erruet an dra-mañ 
Hag emañ en neñv Sant Erwan. 

Ha diwall zo ouzh an ifern 
D’an hini ’deskas an ofer’n, 

Hep he c’hanañ ’pad e vuhez : 
Ur wech marv ’ranko neuze. 

    **** 

D’un nozvezh eta ur mezvier 
Dre Lokmikael oa ’vont d’ar gêr. 

Daouzek taol hanternoz ’skoas : 
Hag eñ dalc’het war an hent bras, 

’Vitañ en hent na wele den ; 
Nemet ’kleve tud o tremen, 

Pe daou-ha-daou, pe tri-ha-tri, 
O tont eus gardenn Minic’hi. 

Na ger etre an eneoù. 
Gant pep unan oa ur gouloù. 

A-dreñv d’ar bale benniget, 
E-giz ur manac’h dilerc’het 

’Deue ur c’hloaregig e gwenn, 
’Vel da ouelañ pleget e benn ; 

’Vit lâret e ofer’n gentañ 
’Michañs ’deue gant ar re-mañ. 

Burzhudus ’vije da welet, 
Evel un aoter kempennet 

D’an ofisoù ’kaner outi, 
Sant-Mikael neuze ’lugerniñ, 

Lugernus an tour tro-war-dro, 
Ar c’hloareg ’vel m’oe aet eno. 

Hag ur burzhud all ez oa c’hoazh, 
An eneoù war an hent bras, 

Pep hini gant e c’houloù gwenn, 
Evit selaou an oferenn. 

    **** 

Sav eta, sav, avelig-noz, 
Da gas betek ar baradoz, 

Evel pedennoù an aelez, 
Ar c’hlemmgan a deu alese, 

Pedenn ha klemmgan pinijenn 
Evit ar c’hloareg en anken ; 

Rak ar re ’pedjont evitañ 
En o buhez, ’ra c’hoazh bremañ : 

D’ar re garet a chom atav 
Ha koun ha keuz dreist ar marv. 

Hag an avelig-noz neuze 
Evel an ogroù a gane 

’Us d’ar gouloù, pe ’vel ar groz, 
Hep o mougañ, an avel-noz. 

Ha goude ken burzhudus all 
’Vije da glevout en noz dall 

En-dro d’an tour o c’houl’ digor, 
’Vel ouzh ul lestr, un evnig-mor ; 

Teir gwech oe klevet, en noz-se, 
Klemm ar goulm-mor a darnije ; 

Evel kloc’h-galv d’an ofer’n-bred : 
– Introibo, – ’lâre bepred… 

    **** 
Deizioù war-lerc’h, ur baleer 
’Goul’e gant sakrist Landreger : 

– Evit petra, teir noz a zo, 
Emañ ar c’hleier ’vont en-dro ? 

’Vit un tan-gwall eo marteze ? 
– Evit danvez ur beleg eo, 

Aet d’ar bed all hep ofer’niañ, 
A vrall ar c’hleier o-unañ. 

Ha na gavo ket ur c’holist 
D’e ofis, eme ar sakrist, 

Nemet ur mezvier, en hent don, 
Ar pec’hed marvel ’n e galon. 

Siwazh ! ’vit Ronan eo, marv 
A-raok belegiañ ’n e vro… 

    **** 
Mard eo erruet kement-se, 
Ra frealzo ’n Aotroù Doue !