War bez Brizeux

Genre
Poésie
Langue
Breton
Source
Paris, J. Maisonneuve, 1898
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

Pirc’hirin kaezh, lavar din-me 
Perak er Garnel a gane 
’N noz-mañ an eostig ’us d’ar bez ? 

– D’an hanternoz eostig Karnel 
Koantik a gane da c’hervel 
A-greiz e hun barzh Breizh-Izel. – 

Lavar din-me, touller-bezioù, 
N’eo ket e bered Arzano 
Ur goulmig ’ve klevet atav ? 

– D’an hanternoz ouzh skeud al loar 
Bemnoz a hirvoud gant glac’har 
Ar goulmig wenn o klask he far. – 

’Vit an noz-mañ ’int tarnijet 
Skañv ’vel eneoù diboanet 
D’An Oriant, an evniged. 

Neuze zo lâret an eostig 
En deus klemmet d’e wenn goulmig : 
– ’B’oe tregont bloaz ’on reuzeudik. – 

Kerkent ’neus ur gomz dispaket, 
Brizeux ha Mai a zo gwelet, 
Eñ ’vel un den reuzeudiget 

Hag hi kaer ’vel ur bleunienn hañv ; 
– Dre ma huñvre, klouar dezhañ, 
’Oan o c’hortoz an eured-mañ. – 

He dornig flour ’vel m’astennas 
Eñ ’vel ur paotr flamm a deuas : 
Ha da lugern bolz an neñv noazh. 

Ha da gemer o nij neuze 
A-du d’an neñv an daou ene… 
Holl evnigoù Breizh a gane. 

Ha dreist al loar, dreist ar stered, 
Da virviken ’int euredet 
E baradoz ar Vretoned. 

Na hirvoud ken d’an hanternoz 
Nag ar goulm nag an eostig-noz, 
’Met ’kanont gwerz ar baradoz.