Barroù spern hag ivin (3)

Genre
Poésie
Langue
Breton
Source
Paris, J. Maisonneuve, 1898
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

        III 

    Me ’gar dindan skeud ar stered 
    Heuliañ koumoul en oabl stennet, 
    Bale d’an eneoù poaniet. 

    Gwragez ’meus sellet ur vandenn 
    O vont e du, gouelet o fenn ; 
    Unanig a semplas a-dreñv ; 

    D’he c’halon ’dougas he dornig, 
    ’Lec’h ur spernenn a dreuze mik, 
    Ha bleuñv lili ’beg ar bodig. 

    Ha klevet ’meus ’vit an noz-se 
    Ur vouezhig kuñv dre ma huñvre, 
    Ken truezus din a lâre : 

    – Mar plijfe deoc’h sevel ma foan, 
    ’Distrofet war ma bez buan, 
    ’R barr ivin ’bodfet hoc’h-unan…– 

    Evit he c’havout, Doue ’oar, 
    ’Afen dre ur mor a c’hlac’har 
    Pe tan ar purgator dispar ; 

    Me ’oar ivez ’oe miret din 
    P’emañ en enkrez, betek m’in 
    D’he diboaniañ war ma daoulin ; 

    Ha p’am bo savet hec’h anken, 
    War ar goabr skañv n’hirvoudo ken, 
    Na biken n’he gwelin, biken… 

    Ha didruez ’on ’ta, siwazh ! 
    Ma finijenn-me ’ve re wazh : … 
    Dezhi me ’dougo ’n ivin glas, 

    P’em galvo Doue ma-unon* ;    [ma-unan]
    Ha d’he zro ’treuzo ma c’halon 
    Gant he spernenn ; ra treuzo don ! 

    Ha war he lerc’h m’ene poaniet, 
    Hon-daouig ouzh skeud ar stered 
    Gant ar c’houmoul ’afomp bepred.