Barroù spern hag ivin (1)

Genre
Poésie
Langue
Breton
Source
Paris, J. Maisonneuve, 1898
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

       I 

    An deiz m’on aet pell ouzh ma bro, 
    D’an holl ’meus lâret kenavo. 

    Hag o tremen ouzh ar vered 
    Da droad ar groaz ’on daoulinet ; 

    Ur garlantez spern ha lili 
    Am eus bountet en douar pri, 

    Ur bodig-spern, ’vit e gempenn 
    Staget tro-a-zro lili gwenn ; 

    Pedet ’meus an Aotroù Doue 
    (Ma glev Doue pedennoù-se) : 

    – Hounnezh a dalc’h ma c’halon baour, 
    An Ankoù ra d-ay da’m sikour 

    Evit an anken d’he stardañ, 
    Ur wech ma ve de’i da’m ankouaat ! 

    Evel ur sparl e rod ar c’harr 
    ’Treuzo bod-spern kalon digar, 

    Ha ’mesk lili gwenn hec’h ene 
    D’ober he foan ’chomo noz-deiz ! 

    Ha r’ c’hoarvezfe din kement all !… – 
    Diwallit ouzh pedennoù fall 

    ’Raok oe disec’het ar bod glas 
    Ha gweñvet lili ’troad ar groaz, 

    ’Troas he fenn d’ar plac’h yaouank : 
    Gouelet am eus, ’vel ruilh ar stank. 

    Ma dousig-koant am boe gouestlet, 
    Ha d’an Ankoù z-eo dimezet ; 

    E bered hon farrez bremañ 
    A gousk hec’h hunig diwezhañ.