War ar maez
- ur Ger a-raok
- Breizh-Izel
- Klemmgan Brizeug
- Mona
- Gwreg ar cheminod
- Kanaouenn ar c’havell
- Pedenn ar mederien eus ar mintin
- Soazig
- Tina, merc’h ar miliner
- Distro an nevez-amzer
- an Itron Varia Sant Kare
- Mervel zo ret
- an Abardaez en un tiegezh, en hañv
- ur Son kloareg
- Eus holl vroioù ar bed
- War ar maez
- Ivona Kerizel
- ar Prad falc’het
- Kerez Sant Per
- un Amzer a zo bet
- Fañchig ha Janig
- ar Mederien
- Son
- Janedig koant
- Kenavo !
- Marc’harid an nezerez
- Yezh kozh hon zadoù
Em c’hoazez war ar geot, dindan ur gistinenn,
Tost d’ur c’hleuz goloet a vleuñv balan melen,
E sellen a bep eil an oabl hag an douar...
Rak an heol ez oa sklêr, hag an avel klouar.
Ma lavaren ’vel-henn : « Bravañ ma’z eo bevañ
War ar maez, e miz Mae ! — Dre holl ’weler bremañ,
Er c’hoadoù, er pradoù, delioù glas ha bleunioù,
Ha dre-holl zo c’hwezh-vat, er parkoù, en hentoù.
Ar goukou, ar gudon hag ar voualc’h beg melen
A gan a bep tu din — betek a-us da’m fenn
Zo ur piñsin bihan, ken koantik, ken seder !...
’Vel ma sav bet’ an oabl mouezh skiltr an alc’hweder !
Du-hont, pell, e klevan, ’barzh ar prad, o vlejal
Un tarv, ha pelloc’h, ur marc’h o c’hourrizal...
Met a belec’h e teu kement-mañ a c’hwezh-vat ?
N’eo ket ar bod burlu ’zo aze eus ma zroad.
Nann, pa droan ma fenn, e welan du-hont, pell,
Er park, ur bod spern-gwenn : ac’hane an avel
’Degas ar c’hwezh amañ. — Setu e Plouared
Ur vadeziant o son ! — Kleier ma bro, sonit* ; [sonet]
Sonit, ha grit d’anaout da bep hini er vro
Ez eo un aelig gwenn war hon douar distro !
Ar c’hleier ’son laouen — met ar bugel a ouel.
Lavar, petra eo dit gouelañ ’vel-se, bugel ?
Da dad zo ken laouen, hag an deiz zo ken kaer !
Penn-da-benn war da hent eostig hag alc’hweder
A gane ken koantik ! — Er c’harzh hag er parkoù,
Ez oa kan, ha c’hwezh-vat dre-holl gant ar bleunioù.
Ha keuz az pe, mabig, da vout deut war ar bed ?
Ar bugal na lâr ger, nemet gouelañ bepred :
Hag ar c’hleier a son, hag ar beleg a gan :
Te Deum Laudamus !... d’en abed* na ra van ! [daeroù ?]
Petra ’ta zo kiriek ma oueler o c’henel ?
Ma oueler er vuhez, ma oueler o vervel ?
Bugelig, lavar din, te her goar, marteze :
O ! lavar, bugelig, petra eo kement-se.
Marteze... » Met pelec’h ’ya ’r marc’h pennfollet-mañ,
E voueñ holl en avel, hag e lost reut gantañ ?
— Redek ’ra, gourrizal, savet gantañ e benn,
E zaoulagad ’lugern, ken ruz ha div c’hlaouenn !
Setu eñ dreist ar c’hleuz lamet ’barzh ar park bras !
Eno zo ur gazeg yaouank war ar geot glas...
— E traoñ ar prad, du-hont, e-touez ar gwern, klevit [klevet]
’Vel kan an durzhunell, damdostik d’an dour-red.
Met an heol a diskenn du-hont a-drek ar roz,
Kleier ar C’hozh-Varc’had ’glevan ’son ar glaz-noz,
Pierrig ar paotr-saout a dastum e loened,
’N em strakal e skourjez ; d’ar gêr eo koulz monet.
Setu ’vel ’tremenan ma devezhioù amañ
— Ul levr ganin ’n em dorn — met hep sellet ennañ ;
Ez an eus park e park, eus favenn da dervenn,
Pe ’n kreiz ar geot uhel, ar bleunioù ’us da’m fenn !