III Pennad

Genre
Theatre
Language
Breton
Source
Brest, Moulerezh ru ar C’hastell, 1926
Notice
The spelling has been modernized, but some forms (mutations, verbal particles...) has been kept.
Transcription
Sébastien Marineau
In the same work :

PENNDRASK, NERZHVEUR

NERZHVEUR o tont en ti, teñval e benn
                                                       Pegen brav
Eo bezañ ’veldout-te, Penndrask, diglemm atav,
N’eus forzh petore liv a deu war an amzer,
N’eus forzh ouzhit ivez pegen rog e komzer !
Daoust ha petra ’ro dit nerzh da vezañ ken reizh ?

PENNDRASK
Ur garantez nevez gwriziennet don em c’hreiz.

NERZHVEUR
Sell, skourr aze Glasluc’h ouzh e dach alaouret,
Ha kaozeomp un tamm diwar-benn va eured.
Me ’meus ivez, ’veldout, nevez deut em c’halon,
Ur garantez na ra ’met krignat ac’hanon.
Perak din-me ’ra poan pezh a ra vad dit-te ?

PENNDRASK
Dre ’n abeg n’hon eus ket hevelep karantez :
Va hini-me ’n em ro hep klask restaol ebet ;
’Lec’h te ’fell dit bezañ dreist an holl dibabet
Ha, goude ’tevo bet dit da-un’ Hollvelen,
Marteze n’he dalc’hi ’met ur bloavezh hepken.

NERZHVEUR
Te ’wel deun va mennozh ’vel un divinourez.
Dreist pep tra, dreist pep den ’karan va c’hadourez ;
Met aon am eus, ’raok ma vin bet ur bloaz ganti,
E teufe ar skuizhder da son an disparti.
Mard eo flamm he gened ha drant he yaouankiz,
Un dalvoudegezh kaer ivez ’neus ar frankiz,
Hag an armoù sklentin, hag ar c’hirri-brezel,
Hag ar stourmoù ruz-gwad ; ha, pa daolan ur sell
War va c’hleze Glasluc’h ken brav puret ganit,
D’Hollvelen na dezhañ n’hallan reiñ ar gounid.
Nec’het ’on, nec’het dall ; n’ouzon petra d’ober.

PENNDRASK
Me, Nerzhveur, ma kerez, ’lâro dit berr-ha-berr :
Un hudour ’an’vezan, deut un tamm war an oad,
Hag a oa brudet bras gwechall en hon broad
Da gelenn mat an dud ; dreist-holl em eus klevet
N’eo bet c’hwitet biskoazh war ingailhoù eured.

NERZHVEUR
Amañ eo deut gant ar Gelted ?

PENNDRASK
                                                      Ya : hennezh eo
Ar sorser touraniad a lesanver Hildeo,
Hag a gonter ur mestr da louzaouiñ loened.

NERZHVEUR
Da hennezh, just a-walc’h, ez eo lâret donet
War-dro va c’hadgi Tonk.

PENNDRASK
                                             Deut eo, hag emañ c’hoazh ;
Rak bepred eo klevet harzhadeg yud ar chas.

NERZHVEUR
Lâr dezhañ ’ta, pa vo disoc’h gant ar c’hadgi,
Donet war-eeun da’m c’haout.

PENNDRASK
                                                     Graet ’vo da gevridi.

NERZHVEUR o sellet dre an noz gleiz
Tan-kurun ! Minter kozh oc’h erruout bremañ !
Hildeo a c’hortozo ma vo fin gant hemañ.

PENNDRASK
Ya, Nerzhveur, bez dinec’h : ar sorser a c’hedo
Ma vo Minter aet kuit, ha ’n em gavet e dro.

Penndrask a za ’maez dre an nor a-zehoù, Minter a deu dre an nor a-gleiz.