IV Pennad

Rumm
C’hoariva
Yezh
Brezhoneg
Orin
Brest, Moulerezh ru ar C’hastell, 1926
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

NERZHVEUR, KARNAK, hag o tispak eus dindan ar c’hoad HOLLVELEN, GARWENN, PENNDRASK, RU-TAN, SKOAZHEG, KREÑVBOST

KARNAK o tistreiñ gant e wareg stennet, a wel e c’hoar o tispak da gentañ
A ! trubardez ar foeltr, va c’hoar eo ’n hini ’ro
Hentamant ha skoazell d’enebourien hon bro ?
Kae dizale da glask digant hon doueed
Ar gopr a zo ganit ken leal gounezet.

Hag e tenn.

PENNDRASK en ur gouezhañ d’an douar, tizhet en he c’hreiz gant bir he breur
’Mañ va marv ganin, ’met e varvan seder
Pa ’meus troet diwar Nerzhveur taol ar meder7.

Hag e varv ouzh treid Nerzhveur.

NERZHVEUR
Trugarez dit, ha meuleudi war da anv !
Bleunioù koant an eñvor ’vidout a ziwano,
Merc’h yaouank Touraniz : rak goût ’ouzon bremañ
Ouzh piv ’n hini oa deut da galon da dommañ.

KARNAK en ur sevel adarre e wareg troet war-zu Nerzhveur
Da hini-te, marc’h dall, na dommo ken nemeur :
Lâret ’c’hall Hollvelen kenavo da Nerzhveur.

Met, a-raok tennañ, emañ kroget, paket, liammet gant ar pemp Kelt, Hollvelen o sachañ e wareg digantañ.

HOLLVELEN o vont d’e skeiñ gant he c’hleze
Te ’lâro da gentañ kenavo d’ar vuhez,
Teuz an oberoù noz, bourrevier didruez !

GARWENN en ur gregiñ en he brec’h
Nann, Hollvelen, n’ez ket da lazhañ ’nezhañ c’hoazh :
N’eo ket dleet d’hennezh mervel evel ur gwaz.
Greomp deus ma venno Nerzhveur.

HOLLVELEN
                                                             Gwir a lêrez.

O tistreiñ gant Garwenn war-zu Nerzhveur, e lamm da bokat dezhañ ; an tri waz a chom da ziwall Karnak.

Ha te, va mignon holl-garet, penaos a rez ?

Ganti e-un’

O ! divaloat tud ! gwadañ ’nezhañ ’deus graet ;
Met arabat ’ouefe an dizremm m’eo lakaet.

NERZHVEUR
Brav-tre emaon, ken brav ma soñjan huñvreal.
Trugarez dit, ha da Benndrask, ha d’ar re all !
Met n’ouzon ket, siwazh ! piv da drugarekaat.

HOLLVELEN
Biken, ’nez da Benndrask, n’hon bije gallet ka’t
An dachenn pellguzhet ’oas degaset enni.
A ! setu an daou all o tont gant an hini
’Oa tec’het dindan goad.


7 Taol ar meder, taol ar marv, ar c’hadour a lazh a hañval ouzh ur meder. [T. Le G.]