da F.-M. Bothorel

D’ar bemzek a viz eost, e mil nav c’hant unnek,
En em glevjomp da vont da bardon ar Releg,
Ur pardon ar c’haerañ, brudet-bras e pep bro,
Treger, Leon, Kerne, gortozet tro-war-dro.

Diouzh kostez ar C’hreisteiz an heol oa ken lintrus
Ma santemp er menez ar bignadeg poanius ;
Gant plijadur, eta, war al lein e savjomp.
Eno, hervez ar c’hiz, un ehan a rejomp,
Eürus er gouyender skignet e Breizh-Izel,
Kerkoulz er gwaflennoù hag el lec’hioù uhel.

Er poent-se, divroet, va spered, va memor,
A nijas, ’enep din, eus ar menez d’ar mor...
Diseblant e sellen ouzh ar roc’h arc’hantet,
A ledane he skeud war al lann alaouret,
Pa gleven er pellder mouezh trist ar gornigell,
E giz ur son klemmus douget gant an avel.

E gwirion’, ne welen, Frañsez, va c’hamalad,
Nemet hor mignoned - soñj en eur o c’himiad ! -
Aet amañ ha du-hont.. O c’havout a rin ken ?
Dalc’homp, da vihanañ, o eñvor da viken !...

    ***

Deomp war-zu ar Releg. En un draonienn dudius,
Gant pebezh joa ’teuer da veuliñ Mamm Jezuz !
Benniget ’ra vefet ’vit ho choaz koant, iskis,
Menec’h pe veleien, saverien hec’h iliz !

Gwechall ur C’hernevad, pe yaouank pe den kozh,
Ne dremenje Are anez ober ur poz,
Hep dont da zaoulinañ e-barzh Roc’h ar Salud,
Da lavaret « Hon Tad », « Mari, ni ho salud ».
Ma tistroe ur sell diouzh Mamm ar Vadelezh,
E vije ur sell dous, ur sell a garantez
Etre daou zen yaouank a bell zo prometet
A sante o tridal o c’halon teneraet.

    ***

D’ar Roc’h e tostaemp pa weljomp Braspardiz
O pediñ ’n he c’hichen ’vel e-tal un iliz,
D’ar c’houlz ma echuont ’n un ober sin ar Groaz
E chomomp sebezet... Den Doue ne nac’has :
Hon merc’hed ’n em renkas ’vit ober o fedenn,
Ni, paotred, gant respet, ’zizoloas ho penn.
’N ur bed leun a vister kentelioù kozh ar Feiz
’Zihune birvidik ’vit dasson en hor c’hreiz !

Roc’h ar Salud : etre ar Fouilhez hag ar Releg