O pesketa

Genre
Poésie
Langue
Breton
Source
Annales de Bretagne
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Précisions
Numéro XVIII, 1902, pp. 212 et ss. – Second prix de recueil de poésie, second prix de sône, mention pour le concours de gwerz au concours organisé par l'Union Régionaliste Bretonne à Quimperlé en 1902.
Transcription
Sébastien Marineau
Dans le même ouvrage :

Avel kuzh-heol deus ar beure,
Broutac’h hon devo c’hoazh hirie :
En ti, er maez gwashañ tommder !
Da besketa gwellañ amzer !

« Yann, prim er prad da vuzhuka !
Fañch, el lanneg da c’hwileta !
Hag, er c’hreiz-se, me a reizho
Glastrenn, linenn hag higennoù. »

Gant difrez paket ma samm lein,
Ma sac’h pesketa war ma c’hein,
Me da redek ’trezek ar stêr
’Vel ’ra d’an ebat an dañser.

Nag a lamm en dour ar pesked !
’Kaerañ fritadenn ’raok nebed* !    [nebeud] 
Flip ! Flip ! Bec’h zo war ar c’hwiled,
Met foei warne’ ! N’int ’met darsed !

Du-hont, dindan ur bouchad gwern,
E tle bezañ duzhed dre vern ;
Deomp goustadik a gammed flour,
Anez… Aet hor c’hoan gant an dour.

Flip ! Flip ’dare ! Paket unan !
Dreist penn ’meus her stlapet el lann !
Gwall fourgas ’ra du-hont, e krec’h,
Wan an amann e vezo bec’h.

Pe vezin distro war ma c’hiz,
’Vo lâret c’hoazh ’vel ’mañ ar c’hiz :
« Gant seurt amzer da besketa !
Me ’ouie n’ho pije netra ! »

Me a droc’ho : « ’Leizh ho kenoù
Eo laosket gevier divalav ;
Biskoazh den ’diotoc’h, Naig…
Stouvit ho peg, ha d’ar bilig ! »

Met, ar pesk du-hont a vo poac’h* ;    [poazh] 
Hastomp hel lakaat en hor sac’h !…
’Tro Doue !… An darvoud flemmus !…
Da c’hlesker setu aet ma dluzh !

Ur c’hi a dapfe un taol troad,
E-lec’h an askorn da lipat,
N’afe d’e loj gant mui a herr,
’Vit nann on distroet d’ar gêr.

’Vel ur penn mouzhet ’hed an hent,
O krozmolat etre ma dent :
« Perak er stêr emañ kevret
An dluzhed hag ar gleskered ? »

Met, ’vel mañ ’n amzer, her kemer
Zo ar gwellañ tra da ober ;
Ba ! En dro-mañ… Evel bepred
’Meus gwelet c’hoazh kalz a besked !!