Son ar butuner

Genre
Poésie
Langue
Breton
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Précisions
Kroaz ar Vretoned, 13/02/1916
Transcription
Sébastien Marineau
Dans le même ouvrage :

Gwellañ louzoù zo war an douar
Eo ar butun da bep glac’har
          La direi, tra la ;
Doue hen hadas, a gredan,
          La direi, la direi,
Goude pec’hed hon tad kentañ,
          La direi, tra la.

’Vel keuneud sec’h stlapet er forn,
Da heul mogedenn c’hlas ma c’horn,
          La direi, tra la ;
Trubuilh, dienez, dizesper
          La direi, la direi,
’Ya da netra e berr amzer...
          La direi, tra la.

Poslez ha loakr eo ma gwreg,
’Vel kroc’hen touilh eo rust he beg,
          La direi, tra la ;
He divc’hroazell a zo rampet,
          La direi, la direi,
N’oufec’h kavout falloc’h stuzet
          La direi, tra la.

’C’hanta ! ’dal ’ve tanet ma c’horn,
’Gavan ken ’sell Janed a gorn,
          La direi, tra la :
’Vel ur rozenn ’teu flour ha koant,
          La direi, la direi,
Ha penn-da-benn ’ve diouzh ma c’hoant,
          La direi, tra la.

Pe c’harm, pe vlej ma bugale,
Ken ’ve un drouz ifern gante,
          La direi, tra la,
Prim, un tamm butun ’n em c’horn pri,
          La direi, la direi,
Hag e tremen ma barr-sodiñ,
          La direi, tra la.

Da bep pred patatez ha yod,
Gwir geusteurenn ur parpailhod !
          La direi, tra la ;
Ba ! ur c’hornedad goude-se,
          La direi, la direi,
Setu me graet ur pred roue,
          La direi, tra la.

War ma chouk n’eus nemet truilhoù,
A-dammoù emañ ma bragoù,
          La direi, tra la ;
’C’hanta ! gant ma c’horn ’n em godell,
          La direi, la direi,
Me ’gav ’meus madoù a-grugell
          La direi, tra la.

Met sadorniñ ’ra ma butun... ?
O neuze ’vat, tan ha kurun !
          La direi, tra la ;
Foeltr ha kounnar ’vez war ma zro,
          La direi, la direi,
Daoust da Janed ha d’he daeroù,
          La direi, tra la...

’vit goût ha ven marv da vat,
’Po ’met tanañ din ur c’hornad,
          La direi, tra la ;
Ma n’am gwelit ket o tridal,
          La direi, la direi,
D’ar vered ma c’hasit raktal,
          La direi, tra la.

Met ’raok ma leuskel er poull don,
Lakit ma c’horn war ma c’halon,
          La direi, tra la ;
Gantañ ma sammig relegoù,
          La direi, la direi,
Hep diaezañ a boutrennoù,
          La direi, tra la.

Da c’hortoz monet en neñvoù,
Gant butunerien kozh ma bro,
          La direi, tra la ;
’Lec’h karo Doue hon lezel,
          La direi, la direi,
Da danañ ’wechoù hon c’herniel,
          La direi, tra la !