Del melen

Genre
Poetry
Language
Breton
Source
Sources are peculiar to each text.
Notice
The spelling has been modernized, but some forms (mutations, verbal particles...) has been kept.
Transcription
Sébastien Marineau
In the same work :

Setu e kouezh an del melen
War bep hent, war bep gwenodenn !
Ma ene holl melkoniet
A soñj en amzer dremenet,
En nev’-amzer eus he buhez
A oa ken sioul ha ken gae :
Hi ’wele neuze diragi,
Er pellder glas o lugerniñ,
Plijadur, brud, kaloniezh,
Lorc’h, diduell ha braventez,
Danvez, enor ha joaiusted,
’Vel ur we’ennad frouezh alaouret :
Huñvreoù kaer ha seblantoù
Diskaret holl war an hentoù !
Warne ’kerzhan, teñval ma fenn,
Kenkoulz ha war an del melen.

Setu e kouezh an del melen
War bep hent,war bep gwenodenn !
Me ’soñj en avel didruez
En deus c’hwezhet war ma buhez :
Siwazh din ! skubet eo gantañ
Al lod gwellañ, al lod brasañ
A gement ’lakae ma c’halon
Pa da dridañ pe da zasson.
Piv ’nivero ar vignoned,
Ar c’herent am eus-me kollet,
Ar reuzioù, poanioù, trubuilhoù
O deus graet din skuilhañ daeroù ?
Aesoc’h ’ve lâret pet delienn
A zo strewet war ’r wenodenn.

Setu e kouezh an del melen
War bep hent, war bep gwenodenn !
Mont a ran betek ar vered
War bezioù ar re ’meus karet :
O c’horfoù paour a zo amañ
O c’hortoz ar varn diwezhañ,
En irvi ’vel-se ’ve an had
Tre ken ma zoug bleuñv ha torc’had.
O eneoù - o soñj ferv ! -
Pelec’h emaint goude ’r marv ?
Gwan ha bresk ’oant eveldomp-ni,
Allaz ! m’o c’hlev o hirvoudiñ
Hag o lâret din gant anken :
« Reit soulaj deomp dre ho pedenn,
Hor sikourit e an’ Doue
ma c’hellimp prim pignat d’an neñv. »

Setu e kouezh an del melen
War bep hent, war bep gwenodenn !
A-raok pell an erc’h hag ar rev
A lako doan war ar maezioù :
An intañvez, an emzivad
A vo hep tan hag hep dilhad ;
Tro-war-dro deomp ar beorien kaezh
A laosko klemm an dienez.
Piv dioute n’en devo truez
Mar en deus ul lomm karantez ?
Piv d’e na rey an aluzenn
Keit e pado an amzer yen ?...

Setu e kouezh an del melen
Gant c’hwezh an avel o tremen !
Ma spered bremañ a darnij
’Us holl an traoù din a zisplij ;
Sevel e ra uhel, uhel
Dreist d’ar menezioù en dremmwel ;
Erruout e ra ’barzh an neñv
Demeurañs an Aotroù Doue,
’Lec’h n’en deus mui na skorn, na goañv,
Na drevell, na glac’har, na kañv,
Met un nev’-amzer peurbadus
Hag un hañv distan ha lintrus ;
’Lec’h en em vagimp ’vit bepred
A zudi hag a eürusted
Hog mignoned hag hor c’herent
Kevret ganeomp e-mesk ar Sent ;
’Lec’h a vimp digollet da vat
Eus pep darvoud, pep huanad,
Hag e vevimp el levenez
Torret ’vidomp pep c’hoantegezh.

En em gonfort, o ma ene,
Rak galvet ’out d’an eurvad-se ;
Bez en-dro seder, dianken,
Na petra ’vern an del melen !...

    14 a viz Du 1902