Barzhaz Breizh : Droug-kinnig Nomenoiou (2)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

An ozhac’h-meur o vont en hent,
Gantañ war e lerc’h e gerent ;

An ozhac’h-meur o vont e-biou,
E-biou ker-veur Nemenoioù.

– Livirit-hu din penn-treuzier
Hag eñ ’mañ an aotroù er gêr.

– Pe ’mañ eñ, pe eñ n’emañ ket,
Doue r’hen dalc’ho e yec’hed !

’Oa ket peurlavaret e c’her,
P’oa degou’et an aotroù er gêr ;

Degou’et er gêr eus a hersal,
E chas bras a-raok o vragal ;

En e zorn e wareg gantañ*,    [K ganta] 
Hag ur pemoc’h gouez war e skoazh.

Ha fresk-bev ar gwad o redek
War e zorn gwenn, dimeus e veg.

– ’Mat deoc’h ! ’mat deoc’h ! meneziz da ;
Ha deoc’h, ozhac’h-meur, da gentañ.

Petra zo c’hoarv’et a-nevez ?
Petra ganeoc’h diganin-me ?

– Deut ’omp da c’hoût hag eñ ’z eus reizh ;
Doue en neñv ha tiern e Breizh.

– Doue ’z eus en neñv, a gredan,
Ha tiern e Breizh, ma her gellan.

– An neb a venn, hennezh a c’hall ;
An neb a c’hall a gas ar Gall,

A gas ar Gall, a harp e vro,
Hag eviti ’taer ha ’taero !

Kenkoulz evit bev ha marv,
Evidon ha va mab Karo,

Va mabig Karo dibennet
Gant ar Gall eskumunuget ;

Dibennet, flour, penn melen-mel,
Da beurgompezañ ar skudell !

Hag eñ da ouelañ, ken a y-eas
E zaeroù betek e varv glas,

Ken a lugerne evel glizh
War vleuñv lili, pa strink an deiz.

An aotroù, pa ’n deus her gwelet,
Toui ruz-spontus en deus graet.

– Me hen toue ’penn ar gouez-mañ,
Hag ar saezh a flemmas ane’añ,

Kent ma gwalc’hin gwad va dorn dehoù*,    [K deo] 
Am bo gwalc’het gouli ar vro !

association Daskor Breizh
06.11.32.35.32.
36, rue Basse,
29600 Morlaix