Poésies de Toussaint Le Garrec : Mouezhioù ar c’havell – evit eured ur mignon
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

          war un ton nevez

Un devezh kaer ’zo ’n em gavet
          Savet ;
Un devezh kaer ’zo ’n em gavet,
An devezh a wel unanet
Ta ri da la la la la la,
An devezh a wel unanet
An Delenn aour hag ar Gened.

Klevet eo bet en o bezioù
          Mouezhioù
Klevet eo bet en o bezioù
Mouezhioù ar Varzhed kozh gwechall,
Ta ri da la la la la la,
Mouezhioù ar Varzhed kozh gwechall
Gant al levenez o youc’hal.

Dre ma welont e ve miret
          Bepred,
Dre ma welont e ve miret
Kement tra o deus bet karet,
Ta ri da la la la la la,
Kement tra o deus bet karet
Ha na vo biken diskaret :

Feiz an tadoù, karantez Breizh
          A-leizh,
Feiz an tadoù, karantez Breizh,
Ar c’hizioù kozh ken kalonek,
Ta ri da la la la la la,
Ar c’hizioù kozh ken kalonek,
Hag ar yezh santel Brezhoneg !

Klevet zo bet ’n o gwele don
          O son ;
Klevet zo bet ’n o gwele don
Telennoù pell zo beziet,
Ta ri da la la la la la,
Telennoù pell zo beziet
O kanañ gae d’an daou bried.

Tud deredet eus a bell bro
          Tro-zro,
Tud deredet eus a bell bro,
A gan a deun o c’halonoù,
Ta ri da la la la la la,
A gan a deun o c’halonoù
A-unan gant an delennoù ;

’N ur c’houlenn digant hor Roue
          Doue,
’N ur c’houlenn digant hor Roue
Ma vevfont laouen hag eürus,
Ta ri da la la la la la,
Ma vevfont laouen hag eürus
En o c’harantez peurbadus ;

M’o devo kerkoulz bugale
          ’Velte ;
M’o devo kerkoulz bugale,
Ma tiskennfont stêr ar vuhez,
Ta ri da la la la la la,
Ma tiskennfont stêr ar vuhez,
Dorn an eil e dorn egile ;

Ha, pa zegouezhfont er gwir vro,
          Marv ;
Ha, pa zegouezhfont er gwir vro,
Ma vo c’hoazh evite sonet,
Ta ri da la la la la la,
Ma vo c’hoazh evite sonet
E baradoz ar Vretoned !

association Daskor Breizh
06.11.32.35.32.
36, rue Basse,
29600 Morlaix