Trubuilhoù an aotroù Gargam (21) : Eil arvest, II diviz
Remarque(s): 
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

AN HEVELEP RE, AN AO. GARGAM 

GARGAM 
A ! C’hwi eo, aotroù ker-meurbet ? 
Gwelit edon dres o tec’het !… 
Abaoe ma’z eo sklêr an deiz 
N’em eus ket tamm peoc’h, dre va feiz ! 
Gwech eo Per, gwech Paol, gwech Goulc’hen ; 
Leun oa va zi a stranerien… 
Ha dezho holl me a ranke 
Reiñ kalanad evit doare… 
 
AR RENER 
Ha setu me erru ivez… 
 
GARGAM 
Her goût a ran ; emañ aze, 
Em c’haierig, ho kalanad. 
Deoc’h-hu me ’ro a galon vat, 
Rak ma’z ouzon an implij kaer 
A rit ganto d’an dud dister… 
M’ho ped, chomit ’ta azezet, 
Ha c’hwi ivez, va mignoned… 
Hag e lavaren deoc’h raktal 
Em boa o c’haset da sutal, 
Da blantañ pour war gein Are, 
Da vrennika da Venez-Bre  
Emaint aze gant o zeod flour, 
Trenk ha trubard evel an dour, 
O kontañ kant ha kant sorc’henn 
Ha n’o deus sur na lost na benn. 
Kement em bevez kalonad 
O reiñ d’ar re-se kalanad 
Kement ez on atav eurus 
O reiñ d’an holl beorien peoc’hus !… 
 
AR RENER 
Aotroù, c’hwi a ra kalz a vad 
D’an intañvez, d’an emzivad… 
 
GARGAM 
Nann, ober a rajen muioc’h 
Ma vijen bet pinvidikoc’h… 
 
Ar rener a ra sin da Laouig da sevel evit lenn e bennad skrid. Sevel a ra, hag e krog da lenn raktal. 
 
« Aotroù benniget, aotreit 
D’ho pugaligoù lenn ur skrid 
Evit meuliñ ho madelezh, 
Ho preder hag ho karantez. 
Abredik ’omp bet dibourvez 
Er bed-mañ eus a bep dañvez ; 
Marv hon tadoù, hor mammoù, 
Den da bourve’iñ d’hon ezhommoù, 
P’eo deuet an aelez d’hon hentañ 
Da di an « Itron Varia » ! 
Gant hoc’h aluzennoù dispar 
’Omp eurus eno, ni ’lavar ! 
En devezh kentañ eus ar bloaz 
Lezit ac’hanon, ur wech c’hoazh, 
Da reketiñ deoc’h bloavezh mat 
Ha kement a zo en ho krad ! » 
 
Ar vugaligoù all a strak o daouarn 
 

« Ni ’bedo ar Mabig Jezuz 
Da viret deoc’h yec’hed padus 
Evit ma reot pell c’hoazh ar vad 
D’ar vugaligoù emzivad. 
 
Strakadeg daouarn adarre.
An Ao. Gargam a sav, hag a gemer ur mouchouer da sec’hañ an daeroù a deneridigezh a zered eus e zaoulagad. Mont a ra goude da gaout al lenner ; kemeret a ra e baper, hag e pok c’hwek d’ar bugel mat. 

 
GARGAM 
C’hwi da vihanañ, bugale, 
A zeu da’m digoll a zoare 
Diouzh ar boan-benn c’hwezhet ennon 
Gant sunerien laer ha lampon… 
Tommañ ’ra va c’halon em c’hreiz 
Evel an heol e-kreiz an deiz ! 
Gant ar garantez e tilamm 
Evidoc’h, yaouankizoù flamm !… 
Na kaerat lizher, sapristi ! 
A rit din aze da’m meuliñ !… 
Met ruziañ ’rankan gant ar vezh 
Pa welan e taolit evezh 
Ouzh va aluzennoù dister 
’Vel ma’z eo ur c’hant skoed hanter ! 
 
AR RENER 
Gant hoc’h aluzenn, aotroù ker, 
E tebromp ur bra tener, 
E wiskomp meur a vinor noazh 
E-pad daou, tri miz eus ar bloaz !… 
 
Ar vugale a stag gant ur ganaouenn savet a-ratoz-kaer evit ar gouel, war don Ar vamm hag ar bugel, diouzh levr Mouezh an Aodoù, gant Glanmor. 
 

KANAOUENN 
 
    Aeled an Neñv, meulit Doue, 
        Ha c’hwi, evned ivez, 
    En uhelder, embannit ’ta 
        Evezh hon Tad kentañ ! 
 
    D’ar boked nevez digoret, 
        El liorzhoù glazet, 
    Doue a ro glizh ar mintin, 
        A lintr en heol lirzhin ! 
 
    D’al labousig nevez ganet, 
        En un neizhig kuzhet, 
    Doue a ro un tad, ur vamm 
        Ha n’hen dilezo tamm ! 
 
    D’ar minorig hep ti na tan, 
        O c’houzañv kalz a boan, 
    Doue a zegas e aelez, 
        Tud leun a vadelezh ! 
 
    Hag e roont hep marc’hata 
        Arc’hant da zornata, 
    Da dud Doue bet dibabet 
        Da sevel minored ! 
 
Adkanañ ar poz kentañ, ma karer. 
 
GARGAM o tiskouez ar vugale 
O c’hanaouenn, aotroù rener, 
Da’m divskouarn a zo tener. 
Me ’grede klevet an aelez 
Du-se (en Neñv) en o rouantelezh ! 
Gant ur seurt komzoù dudius 
Va holl gounnar zo aet da guzh… 
 
AR RENER 
Den ganeoc’h ne gavo dilez, 
Ken bras ez eo ho madelezh ! 
 
GARGAM 
Bennozh deoc’h-holl, bugaligoù, 
Bennozh ’vit ho kanaouennoù ; 
Gant ho mouezhioù sklêr ha lirzhin 
Gae ’on bremañ ’vel ar mintin… 
 
Goude klask en ur c’haier-godell, Gargam a ro ur paper-arc’hant d’ar rener. 
 
AR RENER 
Kenavezo deoc’h, aotroù mat ! 
Ha bennozh ’vit ho kalanad !… 
 
GARGAM 
Tamm ’bet ! Me eo, da vihanañ, 
A galon ho trugareka. 
Deuit ken alies hag ezhomm, 
C’hwi ’oar pelec’h emaon o chom ! 
Ho pugaligoù a bedo 
Evidon keit ha ma vin bev !… 
 
Ar vugale a ya er-maez. 

AR RENER 
Ha goude ho marv zoken, 
N’hoc’h akounac’haint biken !… 
 
Mont a ra er-maez ivez

association Daskor Breizh
06.11.32.35.32.
36, rue Basse, 29600 Morlaix

propulsé par Drupal