Trubuilhoù an aotroù Gargam (14) : Arvest kentañ, XII diviz
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

AN AO. GARGAM e-unan
O pebezh devezh trubuilhus
Eo hemañ ’vit an dud peoc’hus !
Mont a ray va stal da stalig
Daoust din da vezañ pinvidik :

    Re vignon d’al larjentez
    Zigor an nor d’ar baourentez.

Ar c’hentañ klasker a deuio
A vo kaset diwar va zro
Da glask kerden da Sant Mikael
Evit treiñ ganto an avel !
A ! siwazh ! pegoulz ’echuo
Pelloc’h an devezh-mañ e dro ?
Enouet ’on o reiñ arc’hant
Da c’hlaboderien diskiant…
N’ez eus enno tamm karantez,
Yen ’int ’vel ar c’hrishañ goañvezh !…
Ha ma kanfen bremañ ur son ?
Gwelomp ha me ’gavo an ton !
Pa vez teñval penn ar Breizhad
E kan ’vel un Iwerzhonad ;
Pa vez laouen e kan ivez,
Ha daoust pe stad bennak e ve…

    war don Mousig ar Morbihan

    O pebezh devezh kasaus !
    Gant o dremmoù marmouzus
    E teuont pep hini d’e dro
    Da reiñ din taol ar marv !…

    An torroù-penn-se a lavar :
    « Bloavezh mat ! o, me ho kar ! »
    Hag a-dreñv va c’hein e klevan :
    « Hoc’h arc’hant eo a glaskan ! »

    Digorit frank dezho ho yalc’h,
    Morse ne root a-walc’h !…
    A-vec’h m’eo troet o seulioù
    Ma tispennont ho komzoù !…

    Klaskerien villiget, tec’hit !
    Sunerien ’n em zastumit !
    O pebezh devezh kasaus
    D’an dudoù madelezhus !…

    Skeiñ a reer taolioù war an nor

Gwelit ha n’eo ket un torr-penn
Bevañ ur vuhez evel-henn ?…
Ret eo koulskoude digeriñ,
Daoust ’on, siwazh ! oc’h alteriñ !
Petra ’ve lâret ’tal al lenn
Ma n’heuilhan ar c’hiz penn-da-benn ?
Digorit !

Livre

Trubuilhoù an aotroù Gargam (14) : Arvest kentañ, XII diviz
association Daskor Breizh
06.11.32.35.32.
36, rue Basse,
29600 Morlaix