Mouezhioù an Abardaez-Noz (26) : Son Nigouden
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

    D’ar c’houlz ma veve Nigouden 
            Skañv-benn, 
D’ar c’houlz ma veve Nigouden, 
E c’houzañvas gwall blanedenn, 
Tra la la la la la la la, 
E c’houzañvas gwall blanedenn 
Dre ma fazias penn-da-benn. 
 
    Faziañ ’reas o tont gwan, 
            Hep man, 
Faziañ ’reas o tont gwan 
En ur bed ’lec’h ma pik al lann, 
Tra la la la la la la la, 
En ur bed ’lec’h ma pik al lann, 
’Lec’h ne ve netra ’met gann. 
 
    Faziañ ’reas o c’hoantaat 
        Traoù mat, 
Faziañ ’reas o c’hoantaat 
Traouigoù flour ha dilikat, 
Tra la la la la la la la, 
Traouigoù flour ha dilikat, 
 Hag hen n’evoa ket aes da gât*.    (pe gaout) 
 
    Faziañ ’reas o soñjal, 
        Gwir dall, 
Faziañ ’reas o soñjal 
E c’hallje, paour ha stummet fall, 
Tra la la la la la la la, 
E c’hallje, paour ha stummet fall, 
Ober hent koulz hag an dud all. 
 
    Fall a reas en ur greskiñ 
        Deskiñ, 
Fall a reas en ur greskiñ 
Deskiñ d’e spered beajiñ, 
Tra la la la la la la la, 
Deskiñ d’e spered beajiñ 
Ha d’e galon baour hirvoudiñ. 
 
    Met ar fallañ taol ma reas, 
        Biskoazh, 
Met ar fallañ taol ma reas, 
Oe kuitaat, ur wech erru gwaz, 
Tra la la la la la la la, 
Oe kuitaat, ur wech erru gwaz, 
Ar stad izel ’lec’h ma c’hanas ; 
 
    Dilezel ar vicher a gouer 
        Ken kaer, 
Dilezel ar vicher a gouer, 
O soñjal kaout diboan e kêr, 
Tra la la la la la la la, 
O soñjal kaout diboan e kêr 
Kalz da douch ha nebeud d’ober. 
 
    N’eo ket da verraat ur bluenn 
        Hepken, 
N’eo ket da verraat ur bluenn 
’Ve gant Doue laket un den, 
Tra la la la la la la la, 
’Ve gant Doue laket un den 
Ken galloudus ha Nigouden. 
 
    N’eo ket evit chom en toulloù 
        Kampoù.
N’eo ket evit chom en toulloù 
Eo bet savet ’us d’hor fennoù, 
Tra la la la la la la la, 
Eo bet savet ’us d’hor fennoù 
Bolzoù don ha glas an Neñvoù. 
 
    N’eo ket mat da ren buhez kêr, 
        Mab kouer 
N’eo ket mat da ren buhez kêr, 
Na da wiskañ livadenn gaer, 
Tra la la la la la la la, 
Na da wiskañ livadenn gaer, 
Neb en deus douget chupenn verr. 
 
    Ne deuas morse Nigouden 
        A-benn 
Ne deuas morse Nigouden 
Da saludiñ, da vale plaen, 
Tra la la la la la la la, 
Da saludiñ, da vale plaen, 
Da gomz brav ’vel ar vourc’hizien. 
 
    War ar paourkaezh disgwriziennet 
         Bepred, 
War ar paoukaezh disgwriziennet 
E chomas ar merk garanet, 
Tra la la la la la la la, 
E chomas ar merk garanet 
Deus ar maezioù ’lec’h oa ganet. 
 
    Hag en e galon e talc’has, 
        Allaz, 
Hag en e galon e talc’has 
Da son noz ha deiz ’vel ur c’hlaz, 
Tra la la la la la la la,  
Da son noz ha deiz ’vel ur c’hlaz 
Keuz diremed ar parkoù glas !

association Daskor Breizh
06.11.32.35.32.
36, rue Basse,
29600 Morlaix