Mouezhioù an Abardaez-Noz (18) : Son al lann
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

war an hevelep ton gant hini ar pardon

Da veuleudi, lann aour melen,
A rank diston war va zelenn ;
Da gaerder atav a ganin
Tra vo mouezh ha buhez ganin :
Te zo, ’gav din, penn-kil-ha-troad,
Heñvel-touet ouzh ar Breizhad.

Te n’eo ket brav lamet ganit,
Kregiñ ennout zo dic’hounit :
Bezañ ’teus ivin hir ha lemm,
Penn hag a bik, drein hag a flemm ;
Ret eo ivez bezañ paotr mat
’Barzh dont a-benn eus ar Breizhad.

Hogen, mar geo da stumm direizh,
Te zo kalon vat en ez kreiz :
Diwarnout e teu laezh d’ar saout,
Troad d’ar c’hezeg ha gloan d’ar maout ;
E galon ha zoken e wad
A oar reiñ ivez ar Breizhad.

Pe ve divalo pe ve brav,
Te ve bleunioù warnout atav,
Bleunioù alaouret ha seder,
En o zouez kan an alc’hweder ;
Bleuniañ ’vel-se ’ra da bep oad
Huñvreoù er spered Breizhad.

Te c’houl’, ’benn chom yac’h ha digor,
Avel menez pe avel vor ;
Pell diouzh da vro ne rafes ken
’Met disec’hañ gant an anken ;
’Veldout ne ve laouen ha mat
Nemet en e Vreizh ar Breizhad.

Pa gan en ez kreiz an avel,
Mouezhioù kuñv a deu da sevel,
A-wechoù karget a zaeroù
Pe heñvel ouzh klemm tud varv ;
Meur a wech ivez d’huanat
En em daol telenn ar Breizhad.

Breudeur ’omp eta penn-da-benn,
Gant un hevelep planedenn
Staget ouzh ar memes douar
Dindan ar memes heol klouar ;
Rak-se, da vleuñvenn ’vo dalc’hmat
Bleuñvennig karet ar Breizhad.

Livre

Mouezhioù an Abardaez-Noz (18) : Son al lann

Mouezhioù an abardaez-noz

association Daskor Breizh
06.11.32.35.32.
36, rue Basse,
29600 Morlaix