Bombard Kerne (10) : Hent-houarn (an)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

  I 
  
An hent-houarn ! An hent-houarn ! 
Bouzaret eo ma divskouarn, 
O klevet an dud o rakat 
Evel glazarded en ur prad ! 

Hent an Ifern ! ’me Yann Gegin : 
Ijin ouzh ar Spered-Malin ! 
Deiz ar varn, siwazh ! a zo tost, 
Pa’z a Lusifer da vestr-post ! 

Hent ar foultr ! ’me ur c’harretour : 
Barnet ’omp ganit d’evañ dour, 
Konduktored, postilhoned, 
Kement a vev ouzh stag ar foet ! 

Hent an diaoul ! ’me an ostizez : 
Ret ’vo lonkañ ar yod hep laezh, 
Ne dremeno ken dre amañ 
Met pilhaouerien ha chas-klañv ! 

Hent milliget ! ’me an aotroù : 
Te ’neus dallet ma frenestroù, 
Diskaret kraou ha marchosi, 
Lakaet an itron da sodiñ.

Hent ar gounnar ! ’me Bipi-Gouer : 
Te ’neus graet din ur c’hoari gaer ! 
Ma lakaat d’ober ul lev dro 
’Vit darempred ma douaroù ! 

Hent ar mallozh ! ’me un dostenn : 
Te ’neus skarzhet ma zi kempenn : 
Mevel, matezh, ma gwreg Janed, 
Skubet gant ar Cheminoded ! 

Hent ar walleur ! ’me Ivonig : 
Eus toull ma dor ’welen Fantig ; 
Ur menez ’trezomp zo bernet, 
Ur mignon tostoc’h ’deus kavet ! 

  II 
  
An hent houarn, ’ouzomp ervat, 
En deus touzet meur a zañvad ; 
Met lakaet ’neus eur a laoueg 
Da c’hwezhañ n’e groc’hen touzek. 

Taolet ’neus aour e krabanoù 
N’o doa meudet ’met sañtimoù, 
Torchet daeroù intañvezed, 
Dilouedet merc’hed kozh-viret. 

Kement-se zo c’hoarielloù, 
Hepdale ’welfot burzhudoù, 
Eurvad d’an hent, nerzh d’e sutell ! 
Ha pep seurt vat da Vreizh-Izel ! 

Goulenn a rafot, marteze, 
Piv ’neus flutet d’ar son nevez ? 
Ur C’hernevod, o c’hwezhañ start 
’Vit aveliñ e gozh vombard. 

Pet c’hoar henañ ’teus, ma sonig ? 
– Kalz re, ’me ul leanezig, 
Ouzhpenn tregont zo anezhe, 
Unan zo koant… c’hoazh marteze ! 

......................................................

  da’m mignon ha kenvreur F.-M. an Uc’hel 

Kanet am eus gant kalz dudi 
Da cheminaouez Keralzi, 
Na stouv ket bremañ da skouarn, 
Ma kanin dit ma hent houarn.

association Daskor Breizh
06.11.32.35.32.
57, rue Guy Le Normand,
29600 Plourin-lès-Morlaix