Mirouer de la Mort (le) (14) : chapitre I « de la mort corporelle » (vers 419 à 454)

Oar se parfet chetu, pep tu ez concluaff,
Nep á preder an maru, pehiny so garuhaff:
Ha guelet diouz an bet, ez eo ret recedaff,
Lech mat á queff pep guis, euyt he dysprisaff.

An trede peheny, ara dimpny ryal,
Prydiry tir ha mor, en hon maru corporal:
Eo hon ober contant, á beuaff discandal,
Ha lesel hon pechet, hac é holl fet detal.

Contant hon groa yuez, quent egyt fynuezaff,
A compret Pynygenn en hon glen da quentaff:
Ha dre Contrytion hon em abandonaff,
Da doen net en bet man lyes poan hac anaff.

Nedeux negun quen feru, pan preder á meruell,
Na vez é neuz queuzet, ouz guelet é quetell:
Er dre pechet hep mar, ez gouzeff cals harell,
Hac é diuerr é oat, haznat pep vn atell.

Chede plen testeny, an pobl á Nynyua,
Pan gourdrousat certen, dre’n maru yen hep quen tra:
Rac an effreiz dreizaff, na galse ho tassha,
Ez gruesont Pynygenn, heny ten en glen ma.

Dre abec da pechet, cret parfet en bet man,
Pan naz deur diligant, é amant ha gant poan:
En diberrez da oat, da monet gant Sathan,
Da bezaff en ancquen, da byzuicquen en tan.

Maz prederhes dynam compsou flam Sant Ambroas
Ouz queuziff de pechet, meurbet á caoudet bras:
Lech az ve da goelaff, gantaff an quentaff pas,
Ha compret aredec, hep bout dyec ez cas.

Lauaret ara glan, goa me pan em ganat,
Ma ne goelaff affet, dam pechet á pret mat:
Ha ma nen confessaff, ha ma ne lesaff stat,
Hac ober Pynigenn, quent maru ten dam mennat.

Da buhez pechezr foll, so euell horoloig,
Pan deu ferm é termen, á squae dien en cog:
Ha te dren maru diuez, mar ditruez ez brog,
Emæs az gloat ha ty, deffry á rencq dilog.

association Daskor Breizh
06.11.32.35.32.
36, rue Basse,
29600 Morlaix