Annaig (29) : Da’m delenn
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

A-boan m’oa diskennet va mignonez en douar, 
Ma tirollas warnon noz teñval an enkrez, 
Rak den ne gemere perzh e-barzh em glac’har, 
               Den ouzhin n’en doa truez. 

Ma’z eo doanius gwelet, da bep diskar-amzer, 
An delienn o tiskenn, ar vleunienn o c’hweñviñ, 
Goude bezañ soñjet, prestik e lavarer : 
               Ne c’hallent bevañ mui. 

Met me, ken yaouank c’hoazh, bleunienn hanter-zigor, 
Bezañ gant ar gwalleur war va zreid disec’het, 
Taolet ha distaolet, evel war ur gwall vor 
               Ur vag hep stur ebet ! 

Koll a raen pep fiziañs, pa glevis o sevel 
Eus an deñvalijenn ur vouezh madelezhus, 
Skiltr evel an avel, kaer evel mouezh un Ael, 
               En ur ger, dudius. 

Ar vouezh a lavare : « perak kement gouelañ, 
Ha perak er gwalleur plegañ kement da’z penn ? 
Ganez ur vignonez a chom c’hoazh er bed-mañ : 
               Hounnezh eo da’z telenn. » 

Ha d’ar vouezh-se, kerkent, va c’halon da dridal ; 
Dirak va daoulagad an heol a lugerne, 
Bez ez oan ’vel un den, skoet gant un huñvre fall, 
               Pa zihun er gwele. 

O va delenn ken ker ! o va brasañ teñzor ! 
Nag a zevezhioù kaer a dlean dit em buhez ! 
Daoust ha pet a frealzi c’hoazh war douar an Arvor, 
               Goude ma vin er bez ?

Vous êtes ici

association Daskor Breizh
06.11.32.35.32.
36, rue Basse,
29600 Morlaix