Annaig (24) : Va-unan
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

Devezhioù kaer an hañv, evel gwechall adarre, 
A laka levenez er galon, er maezioù, 
Ha koulskoude, siwazh ! me ’ranko, da bep beure, 
               Atav skuilhañ daeroù. 

Rak n’he gwelin ket mui, prim ha gae ’vel ul labous, 
O vont e-kreiz an heol, a-dreuz ar geot tener ; 
E kornig ar vered eo kousket bremañ, didrouz, 
               Va mignonez ken ker ! 

Ne c’hallin mui bremañ tañva plijadur ebet, 
Kalon ha daoulagad zo marv ’vit an douar ; 
Mont a ran d’ar vered, evel un den dilezet, 
               Da guzhat va glac’har. 

Ya, mont a ran alies war he bez da zaoulinañ, 
Abalamour n’eus ket en-dro din ur mignon 
Hag a deufe, dre druez, ur mare da vihanañ, 
               Da frealziñ va c’halon. 

Ral e soñjer, siwazh ! pa vezer el levenez, 
E gwalleur an dud all, en o foanioù skrijus ; 
Mignoned, koulskoude ra vezo c’hwek holl ho puhez, 
               Ra vezoc’h eürus.

Vous êtes ici

association Daskor Breizh
06.11.32.35.32.
36, rue Basse,
29600 Morlaix