Poésies d’Yvon Crocq : Sorserez (ar)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).
* Source : Ar Vro, octobre 1911

           da’m c’hendiskibien ar barzh Jos Albaret
               ha Yann Donnard, diouzh Pontekroaz

– Dindan sklêrijenn velen ar c’hann-loar
Piv ’deu du-hont dre sioulder al lanneg,
Nemet ar miliner, Fañch al Lontreg ?
Mezv bep foar, bep sul, an holl her goar.

Distroiñ a ra d’ar gêr ar miliner divezh,
Goude bezañ lezet e gwer an ostizez
E dammig skiant vat hag e c’hounidegezh.

Un troad a c’hoanta mont war-zu ar mor,
C’hoant egile zo war-zu ar menez ;
Bouzelloù leuniet a-hed an devezh
Ur penn goullo, ur spered divemor :

Setu ar pezh a deu gant ar Rouller d’e di :
Peadra da lakaat e wreg d’huanadiñ ;
Setu labour dispar graet gant ar Vezventi !

Piv eo ar skeud-se ’zo du-hont ’kreiz ar c’hoashent,
E-tal ar wazhig-dour dre al lanneg divent ?...
Fañch al Lontreg zo spontet : ur c’hofad aon en deus,
N’eo ket un den ’zo du-hont : kentoc’h ’vefe un teuz !

Fañch zo manet en e sav, reut,
Ha davetañ, prim, a zo deut
Ur sorserez gozh, kamm ha treut.

« Miliner, emezi, ne dalv ket dit spontañ ;
Ha pa gouezhfe warnout ar c’hleñved ar startañ,
Arabat dit krenañ : me eo ar sorserez !

« Ha pa ’tefe bremañ droug bouzelloù, poan-benn,
Ar gwentr, droug-daoulagad, ar remm pe ar vosenn :
Arabat dit krenañ : me eo ar sorserez !

« Lavar din ’ta da boan ; bez fiziañs em galloud ;
Dizale ne vo ken nag enkrez nag hirvoud.
Arabat dit krenañ : me eo ar sorserez !

« – Gwelet a ran bremañ : poan bouzelloù ec’h eus.
Ul louzoù zo ganin : ev anezhañ hep euzh.

« Al louzoù-se, m’hen tou, ul louzoù dispar eo,
Gouest a-walc’h da lakaat den marv da zont bev,
Burzhudus da yac’haat al Lonker pa vez me’v !

« – Klev, setu amañ krak ha berr
Ar pezh a zo aet d’e ober :

« – Taolet zo bet er pod houarn
Bouzelloù flaerius seizh louarn,
Treid ur ranig, un touseg brein
Bet seizh devezh dindan ar vein ;
M’hen tou, ul louzoù dispar eo
Evit yac’haat al Lonker me’v !

« – E-touez zo bet kemmesket c’hoazh
Seizh penn ki, hag ur bleiz nav bloaz ;
Felc’h ur bouc’h, kroc’hen ur glazard,
Kalon ur Judaz, un naer lart ;
M’hen tou, ul louzoù dispar eo
Evit yac’haat al Lonker me’v !

« – E-pad nav bloaz, seizh gwech bep miz
E chomas al louzoù iskis
Da verviñ war un tantad tan
C’hwezhet gant mevel bras Satan ;
M’hen tou, ul louzoù dispar eo
Evit yac’haat al Lonker me’v ! »

Ha Fañch ar Miliner, ken gwenn hag ar marv,
En deus ranket evañ al loustoni c’hwerv !

War e benn er wazh-dour kerkent ez eo kouezhet :
Eno, diouzh ar mintin, e oa kavet beuzet !...

Lod a lavar penaos, e-pad meur a vloavezh,
El lanneg e oa c’hwezh louzoù ar sorserez !...

    Boharz

Vous êtes ici

association Daskor Breizh
06.11.32.35.32.
57, rue Guy Le Normand,
29600 Plourin-lès-Morlaix