Poésies d’Yvon Crocq : Vogedenn (ar)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).
* Source : Ar Vro, juin 1908

War devenn ar c’hoad don du-se, me ’wel
Un ti soul damguzhet mat er goudor,
E-lec’h ne c’hell tizhout faeüs an avel,
Un ti soul iliavet dezhañ e zor.

Sellit, e vogerioù, ’vel ur c’hozhiad
Daoubleget gant an oad hag ar vizer,
Faoutet evel emaint, kant bloavezhiad
E chomint c’hoazh war sav, daoust d’an amzer.

Diouzh ar siminal gozh ken skarnilet,
A-dreist an doenn, a bign ur vogedenn,
E-giz, d’an amzer yen, e vez gwelet
O tont diouzh e c’henoù alan pep den.

Goustad, o troidellat, ar vogedenn
En em sav gant sikour an aezhennig,
Evit kas da Zoue, d’an Neñv, pedenn
Ar c’hristen paour o chom el lojennig :

    « Amañ, pell diouzh an drouz,
    Pell diouzh safar ar bed,
    Ar maezioù am c’helenn kerkoulz
    Hag an desketañ doktored ! »

Vous êtes ici

association Daskor Breizh
06.11.32.35.32.
36, rue Basse, 29600 Morlaix