Poésies d’Yvon Crocq : Nevez-amzer (an)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).
* Source : Ar Vro, avril 1908

Setu dilezet gant ar bed
Ar vantell keit all zo douget ;
Mantell a gañv, liv al ludu,
Ledet en oabl peurvuiañ du.

Skuizhet o yenañ ac’hanomp,
Ar goañv zo tec’het kuit : kanomp !
Da c’hortoz ma vezo distro,
C’hoarzhomp e-giz ma c’hoarzh hor Bro.

Rak evit gwir c’hoarzhin a ra
Hor Breizh, heol warni o parañ.
An aezhenn a lez war he lerc’h
En un dremen c’hwezh glan ha gwerc’h.

Er prad eo ganet ar bleunioù,
Hag ar spern-gwenn war ar c’hleunioù,
Bleunioù koant gant o c’hwezh dispar,
Spern-gwenn o c’hoarzhin, me ho kar !

Er prad hag a oa riellet
E sav bokedoù marellet,
Ar foenneg a zo spilhennet
Gant ar bleunioù hañv alaouret.

Ar valafennig dre an aer
A ra kant ha kant tro lijer :
Pourmen a ra dre an delioù
He divaskell a bep seurt liv.

Dindan ar brouskoad hag er c’harzh,
Nag a laboused kaer a c’hoarzh !
Gant mall e kanont war o neizh,
Laouenidigezh leun o c’hreiz.

D’ar goañv an amzer vrav zo trec’h ;
Kouezhet diwarnañ ur gwall vec’h,
Fañch Kouer a arvest dinec’h
Ouzh e ed o sevel d’an nec’h.

Hag ar c’hristen paour ezhommek,
En un dremen dre al lanneg,
Aezhenn glouar, heol o parañ,
A zebr c’hwekoc’h e damm bara.

An heol splann a liv al lili,
A domm d’ar paour e izili :
Doue dezhañ a ro d’intent
Pegen koant eo bleunioù an hent.

Diganit, o nevez-amzer,
Nag a vadoù a c’hortozer !
Nevez-amer, da soñj hepken
A ra tridal kalon an den !...

Gortoz a ran un Durzhunell
Da zont da’m c’haout a denn askell...
Nevez-amzer, te a dec’ho,
Met va zurzhunell a chomo !

Vous êtes ici

Livre

Poésies d’Yvon Crocq : Nevez-amzer (an)
association Daskor Breizh
06.11.32.35.32.
36, rue Basse,
29600 Morlaix