Poésies de François Le May : Barzh (ar) (1)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

    I

N’eo ket er skol a ve desket
Kanañ yezh dilenn ar barzhed :
Den na c’hell deskiñ ar yezh-se...
Da neb a gar hen ro Doue !

Ar stêr d’an traoñ a oar redek
Hag ar gwenan kaout ar mel c’hwek,
Koulz hag an evn sevel en aer
Hep bezañ desket hen ober.

Ar barzh, setu, a oar kanañ
Evel ar goulm a oar leñvañ,
’Vel an avel a glemm er c’hoad,
’Vel an dour a c’hwilgamm er prad.

Gant ar barzh na fell ket goulenn
Perak e kan trist pe laouen :
Klaskit kentoc’h gant an eostig.
Penaos e kan war e vodig !...

Ar barzh a ra barzhonegoù
’Vel ma vleuni ar bokedoù,
’Vel ma luc’h ar steredenn c’hlan,
’Vel ma hiboud ar wazhig splann.

War e vanniel a zo skrivet :
Ar gwir, ar mad, ar c’haer – bepred !
An teir geotenn aour na gaver
’Met dre furnezh hag hir amzer.

Ene ar barzh, heklev gwirion
A gement e klev o tasson,
Pa gomz d’an dud en deus kerden
Skiltrus evel re an delenn.

Ma c’hwezh avel ar gwalleurioù
’Vo klevet gantañ hirvoudoù ;
Ma c’hoarzh d’ar bed an eürusted,
Eñ a gano gant joaiusted.

Bremañ, siwazh ! siwazh deomp-ni !
Ar barzh a gan gant melkoni :
Pegiz ’kanfe gant levenez
Pa neuñv an douar en enkrez ?...

Perak kanañ ?... Da zen na fell
Gant ar barzhed selaou kentel :
E-kreiz arneñv piv a glevfe
Son an eostig ken kaer a ve ?...

Met Doue ’ro da bep hini
Ar pezh a blij d’añ d’e veuliñ :
Enor d’an hini na lez ket
Dizimplij ar pezh en deus bet !

association Daskor Breizh
06.11.32.35.32.
57, rue Guy Le Normand,
29600 Plourin-lès-Morlaix