Poésies de François Le May : D’ar Werc’hez Vari
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

Na leun ’ve ma c’halon a zudi,
War ma daoulin pa’z an da bediñ
Dirak hoc’h aoter venniget,
          O Mari !
Rak ma fedenn a ve klevet
          Bepred.

Glan ’oc’h dreist ar Sent hag an Aelez ;
En neñv, en douar ’oc’h rouanez :
Aour, diamant, heol ha stered,
          O Gwerc’hez,
Dirazoc’h-hu o deus kollet
          O sked.

Met evit ho kened da vont bras,
Ho madelezh a zo dreisti c’hoazh :
Warnomp e par ho karantez,
          Mamm a c’hras ;
Ouzhomp e sellit gant truez
          Noz-deiz.

Piv biken a c’hellfe niveriñ
Ar grasoù a ziskenn warnomp-ni
Dre ho taouarn trugarezus,
          O Mari,
A-berzh ho mab hollc’halloudus
          Jezuz ?

C’hwi a ro d’an eneoù fidel
Er stad gwellañ nerzh d’en em zerc’hel :
Dre ar skouer kaer eus ho puhez,
          Mamm santel,
C’hwi o doug tostoc’h da Zoue
          Bemdez.

C’hwi a vir ouzh ar paourkaezh pec’her
Da ziskenn pazenn an dizesper :
Pa sav warnoc’h e zaoulagad,
          Mamm dener,
C’hwi ken distro war an hent mat
          Timat.

Pa vemp dre bep seurt poan glac’haret,
Pa wask an enkrez war hor spered,
Deoc’h-hi mar lâromp hon anken,
          Mamm garet,
C’hwi hor c’honfort, hor rent laouen
          A-benn.

Desket ’omp bet gant brasañ soursi
D’ho karout, d’ho pediñ, d’ho meuliñ :
A-vihanik tre d’ar marv,
          O Mari,
Gant fiañs ni ho enoro
          Atô.

Breudeur Jezuz ’omp, ho pugale !
D’añ ha deoc’h ni a c’hlouestr hor buhez :
War-lerc’h e c’houlennomp un dra,
          Mamm Doue,
Ma vimp, en neñv holl o kanañ
          Gant joa !

    24 a viz Here

association Daskor Breizh
06.11.32.35.32.
36, rue Basse, 29600 Morlaix