Sac’h ar marichal (11) : IX diviz
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

LOULL, YANNIG azezet atav, KROGENNEG, DENEZ, BOLOD

  KROGENNEG da Zenez
Me zo bras va c’heuz, aotroù Denez, da vezañ ho taolet er-maez, met me n’hoc’h anavezen ket – o tiskouez Loull – hag ar skraper-se, gwisket gant ho sae, a oa gantañ doare ur barner a-walc’h.

  BOLOD o welet e draoù en ur c’horn
Sellit ! setu va holl draoù kemmesket war an douar, va morzhol, va zurkez, va dilhad, va boutailhoù goullo. Hirvoudiñ a ra Loull ha Yannig.

  KROGENNEG
Stagañ start a rin an daou ganfard-se an eil ouzh egile d’o c’has d’ar prizon.

  BOLOD o lakaat Loull ha Yannig da gaout aon
Ne vezo ket ezhomm. Evet o deus ar pezh ’oa em boutailh vihan. Ul louzoù eo e oa e-barzh, ul louzoù eus ar re greñvañ evit ar saout klañv. Mervel a raint da gentañ.

  LOULL spontet-naet
O ! aotroù benniget ! Truez ! truez evit tud paour.

  YANNIG o ouelañ dourek
O ! santez Vendrog ! patronez va mamm gaezh, ne fell ket din mervel.

  DENEZ
Da gentañ, en em ziwiskit. Ar saeoù-se n’int ket deoc’h.

  LOULL
Gwir eo, aotroù barner gwir eo. En em ziwiskañ a reont o daou, oc’h hirvoudiñ.

  DENEZ
A-raok mervel, gwelet a rit mat ar pezh a c’hoarvez ganeoc’h. Al laer a zo fin a-wechoù, gwir eo. Met un deiz pe zeiz, paket eo, abred pe ziwezhad.

  YANNIG
Ho pet truez ouzhin, aotroù medisin chatal. Roit ul louzoù mat deomp.. mar... plij... Yannig a gousk mik.

  LOULL
Ya, ho pet truez... ouzhomp... ouzh... Loull a gousk mik.

  BOLOD d’ar re all, o c’hoarzhin
Kousket a reont evel div varrikenn. Ne varvint ket. Ar pezh o deus evet n’eo ket evit reiñ dezho un taol marvel. Kasit anezho kousket mik d’an toull, mar kirit, aotroù Denez. Dihunañ a raint e-tro an abardaez.

  DENEZ da Grogenneg
Mat. It da gerc’hat ur c’harr bennak d’o c’has o daou d’ar prizon.

  KROGENNEG
Ya, aotroù barner.

  DENEZ
Echu eo an abadenn. Ha setu bremañ ivez ar gentel : micher al laer n’eo ket ur vicher vat eo ez eo.

Vous êtes ici

association Daskor Breizh
06.11.32.35.32.
36, rue Basse,
29600 Morlaix