Poésies de Gabriel Milin : Matilin ar barzh dall
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).
* Brest, Bulletin de la Société académique de Brest, Tome Ier (1858-1860), pp. 103-106

Paotred, plac’hed yaouank, c’hwi ’lamme o tridal,
Pa glevec’h, dre Gerne, Matilin, ar barzh dall,
O treiñ, gant e vombard, tonioù ’ouie atav
Lakaat fiñv er wazhied, digeriñ jabadao,
Ouelit, n’her c’hlevot mui ! En e vez yen eo mik ;
Marv eo Matilin, dialan hoc’h eostig.

E ene zo nijet da vro an telennoù,
Bro ar barzhed ’zo bet skiltrus o c’halonoù ;
E kalon ar barzh kozh ’vel un ogroù ’gane,
Hag eñ oc’h ehanañ, evned a ziskane.
Evidomp-ni, Breizhiz, hon diskan zo daeroù :
Kouezhañ ’ra ar gwez bras, sec’h outo an delioù.

E kornig ar vered, kousket en da c’hourvez,
Selaou e-kreiz an noz, a-zindan da vaen-bez,
Selaou hag e klevi avel Breizh o voudal,
O kanañ hirvoudus tonioù ar paourkaezh dall.
Mar tihunez neuze, barzh, n’az pe ket anken,
Rak ma klemm an avel, ouelañ a ra an den.

Anv ’vo ac’hanout gant da vroiz kalonek,
Endra vezo e Breizh ebad ha Brezhoneg ;
Kanañ ’ray da donioù kerden meur a delenn,
Evel ec’h eus klevet Brizeug, barzh blev melen,
Brizeug, ar gwir Breizhad, ’zo e penn e erv
O c’hortoz, ur bloaz zo, skeud ur wezenn zerv.

Matilin ! da vombard ne vezo hep perc’henn :
Da derriñ nerzh ar boan a zo en o c’herc’henn,
E Breizh, ar re ’zalc’h mat banniel ar c’hizioù kozh,
A-zalek gouloù-deiz betek ar pardaez-noz,
A gano gwerzioù kaer savet war da donioù,
Da zeizioù o eured, e-kreiz o fardonioù.

Ar re-se, pa vint kozh, a-benn hanter-kant vloaz,
E-pad an nozvezhioù, ’gomzo ac’hanout c’hoazh :
Azezet ’tal an tan, tro-war-dro d’an oaled,
’Lirint d’o bugale : « Ni hon eus her gwelet,
Klevet hon eus an dall a yae en ur ganañ,
Da c’hounit e damm boued, dre ahont, dre amañ. »

Mar teufes neuze c’hoazh e-kreiz an abadenn,
’Vel n’eus pell, Matilin, Kerneviz a-vandenn
A vodfe en-dro dit, evel un hed gwenan
En-dro d’ur bofig glas, pa soner dezho spann.
Ne dalv hel lavaret : marv ’out da viken,
Ha da vombard a dav, mantret en da gichen.

association Daskor Breizh
06.11.32.35.32.
57, rue Guy Le Normand,
29600 Plourin-lès-Morlaix