Hor mamm-vro Breizh-Izel (05) : Breizh, brezhoneg ha feiz
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

    d’an doktor Piquenard, ar Barzh Melen

Bezañ zo tri ger kaer, c’hwek-meurbet d’ar spered,
Hag a ra d’ar galon tridal gant eürusted,
P’am eus o lavaret e santan evel mel,
Seblantout a ra din klevet kanañ un ael.

Breizh, Brezhoneg ha Feiz, Treinded ar gwir Vreizhad,
He Gredo, he armoù da vare ar stourmad ;
Setu, hep faziañ, nerzh meulet hor gouenn kozh,
Betek ur pennad zo m’eo deuet warnomp an noz.

Breizh-Izel eo ar Vamm - O ! pebezh Mamm dener ! -
Pegement eo bet mat bepred en hor c’heñver !
Gwelomp an degouezhioù he deus lezet ganeomp,
Hag holl bennozh dezhi a-bouez hor penn kanomp.

Hor Mamm ’deus bugale : ar Brezhoneg, ar Feiz,
Kozh-bras ’int evelti, kozh-bras hiriv an deiz.
Tud zo a en em blij oc’h o lâret marv...
Fazi, va zudigoù !... Bev ’int... Int a vevo !...

Doue a zo ganeomp. Penaos keit amzer zo,
E chom ar brezhoneg buhezek ’vel ma’z eo ?
Keit, pa daolomp ur sell war gartennoù ar bed,
Nag a yezhoù marv, pe gant re all mesket !

Gwir eo ur brezel kriz warnomp ’zo dirollet,
Dont a ra eus Bro-C’hall un avel pennfollet,
Ouzh hor yezh benniget ar Gall zo e kounnar...
A ! mar gallje d’an traoñ ar brezhoneg diskar !...

Nann, nann, faziañ ’rit, va c’hredit, tud disakr ;
Setu un arme greñv en-dro d’hor madoù sakr !
Ar Vreizhiz zo kalet evel mein an aodoù,
Evel ar gwez derv ken stank en hor c’hoadoù.

Klevet ’ran lavaret — hag her c’hrediñ a ran —
« Ar feiz a zo laosket ! » Sklêr eo da bep unan.
An deñved zo taget gant bleizi gouez naonek ;
Pelec’h emañ penn kaoz ? e pelec’h an abeg ?

Teir eienenn, me ’gred, da gement-se a zo,
Hep aon, hep kasoni, amañ m’o diskuilho ;
Evit hor Mamm-Vro Breizh mantrusañ gwalinier !
A sko ken dizamant warni e pep amzer.

Ar politik direizh, evel ul loen gouez,
He deus pellaet ar peoc’h, lazhet an unvaniezh ;
Ur gasoni c’hwerv e skolioù hon amzer,
Enep ar brezhoneg er bugel a c’hwezher.

Ha komz a rin ouzhpenn eus a gizioù ar Gall,
A c’hounit hor maezioù heñvel ouzh un tan-gwall ?
Bragoù bras ha chupenn a vez graet fae warno,
Koefoù evel e kêr a ranker kaout hiriv !...

Pep hini ’oar ervat ar brezhoneg, ar feiz,
A bep amzer a zo breur ha c’hoar en hor Breizh ;
Dre-se tagañ unan a zo skeiñ war eben ;
N’int ket hep her gouzout hon holl enebourien.

Ha gwelit goude-se penaos e safarer ;
Koueriaded, bet er skol ur pennadig amzer,
War dachenn ar marc’had a zrailh tammoù gallek,
Mezh o defe diskouez e [c’h]ouzont brezhoneg.

Trec’het war gement-se ’teuer a-nebeudoù
Da zilezel ar feiz, feiz nerzhus hon tadoù ;
Setu eno, Breizhiz, setu ar spered Gall,
Setu petra ’vefomp, ma na garomp diwall.

O va c’henvroiz ker, diwallomp da reiñ dorn
D’an enebour da skeiñ kreñvoc’h war an askorn ;
Ouzh yezh kozh ar C’helted stagomp ’ta muioc’h-mui,
D’ar brezhoneg enor ! Pep hini en e di !...

association Daskor Breizh
06.11.32.35.32.
36, rue Basse,
29600 Morlaix