Gwerzioù ha kanaouennoù (05) : Marv ar breur Yann en Eusa
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

    kinniget d’e gerent
    war don Mab den soñjit

Dreist ar mor bras, du-se er gwagennoù,
Me ’glev hiriv son klemmus ar glazoù...
Petra Eusiz, petra ’ra deoc’h gouelañ ?
Perak ken trist ar c’halonoù bremañ ?

Me ’wel e kañv iliz-veur ar barrez,
Gwisket e du eo holl dud an enez ;
Tristidigezh a weler warnezho...
Livirit din : Piv eta zo marv ?

Daoust ar person, pastor hoc’h eneoù,
Pe ar maer mat, difennour ho kwirioù,
Zo bet skoet, diskaret didruez,
Evel ma vez kalz a re all bemdez ?...

Hag e klevan, a-dreuz kalz a zaeroù,
Holl dud Eusa, unanet o mouezhioù,
Oc’h hirvoudiñ war-zu tud an douar,
O lavaret gant ar vrasañ glac’har :

« Kemerit perzh en hon tristidigezh,
Rak ar breur Yann, den leun a garantez,
Eizh vloaz zo bet o ren skol ar baotred,
Siwazh ! deomp-ni, ar breur Yann zo marvet !

D’hor bugale, ar breur Yann oa un tad,
Kalon dener, gant-se ur mestr-skol mat ;
Dezho ’teske aes an holl skiantoù,
Ha dreist pep tra miret feiz o zadoù.

Bez oa pell zo mignon pep tiegezh,
D’an dud bec’hiet gwir frealzidigezh,
Nikun biskoazh na dec’has dioutañ
Hep lavaret "E lod en deus em foan ! »

Ya, eneziz, lec’h hoc’h eus da geuziañ
D’ho preur Rener, an den kalonekañ ;
Hogen un dra ’chom c’hoazh deoc’h da ober :
Pedit ’vitañ bemdez ’harz an aoter.

Kalonoù baour, taolet ha distaolet
’Vel ar vagig war ar mor kounnaret,
En em daolit e Kalon Sakr Jezuz,
Eienenn c’hlan eürusted peurbadus.

E-barzh em c’hreiz va c’halon zo gwasket
Em daoulagad daeroù puilh zo savet...
A ! me ivez, me ’gare ar breur Yann,
E kañv an holl va ferzh a gemeran.

An Ankoù kriz gant e falc’h diremed,
A sko bemdez koulz a-dreuz hag a-hed...
Kerzhet a ra dreist ar mor fuloret
Evel war zouar dre an hentoù kalet.

Morse truez nag evit tad, na mamm,
Beleg, pried, gantañ espernet tamm.
Menec’h devot, kerkoulz ha tud ar bed,
A rank d’o zro mont da chom er vered.

Setu, breur, ’oc’h galvet gant Doue
Da ziskuizhañ ’hed an eternite ;
’Vit labouroù enoeüs bras ha tenn
Ur gurunenn a luc’ho war ho penn.

E gwered kozh parrez Sant Evarzeg,
Tost d’ar porched, en ur bezig meinek,
’Mañ korf ar breur o c’hortoz deiz ar varn ;
Plijit gant Doue dont en deiz-se d’her gouarn !

Bep sul, bep gouel, war-lerc’h an oferenn,
E vignoned a yelo ’n un dremen
Da lavaret bep a De profundis
’Vit e ene... Lux luceat eis !...

association Daskor Breizh
06.11.32.35.32.
36, rue Basse,
29600 Morlaix