Nouelou ancien (an) (44) : XLIII – Iesus Roue’n effaou a so deuet ouz traou man
* Edition par Théodore Hersart de la Villemarqué dans Revue Celtique, XIII, pp. 334 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650

Nouel voar ton Iste confessor. Neuez ha diuezaff

  519
  Iesus Roue’n effaou a so deuet ouz traou man
Euit dezraou poan ; aman da bout ganet
Gant un Guerches pur dreist natur eurus,
          Leun a ioausdet.

  520
  En un ty dyfflas, en presep un asen,
Ez ma voar an fouen Doue Roue’n glen dysquennet ;
Rentomp dezaff cher seder ha reuerancc,
          Pan omp aduancet.

  521
  Saluer an bedis en languys, a isel
So disquennet hel ; ioayus hel quehezlaou !
Maz dleomp ny offr dezaff proff hon offrancc,
          Hep contannançaou.

  522
  Un lot a enor, tut cosquor, pastoret
A so diredet de guelet a pret mat,
Oll tut a fecçon, gant e donezonnaou
          Euit dezraou mat.

  523
  Seiz dez ha choaz chuech ez viont oz nechy
Try Roue diouz party a deury’n Orient
Oz clasq, credet glan, heman ; hep contanancc
          En em aduancent.

  524
  Madaou en laouen gant e plan* ordrenet   [lisez plen] 
Ho doa digacet parfet, ha credet se :
Aour, myr, spes esancc enyot* ho offrancaou   [peut-être pour en proff] 
          Do guir Autraou voe.

  525
  An Roue Herodes a voe spes encreset
Pan cleuas ganet Roue en bet nemet aff
Maz geure detry e poursiff peur, syouaz !
          Euit e lazaff.

  526
  Ret voe gant meur spont lesel pront an contre,
Dre guir cannat Doue deze oz reuelaff,
Mont gant an Map se, a pell cre, en Egipt,
          D’en em acuitaff.

  527
  Joseph dre guir feiz a voe eno seiz bloaz
En cals a annoaz hac en em dyu mazder* ;  [lisez emdimazder] 
Euel un den guir ouz piril ez myre
          Map Doue guir Roue’n ster.

  528
  Adal maz oa plen an amser tremennet
Ez voe reuelet parfet hep arretaff
Da Joseph e par dont clouar adarre
          Cre en Iudea.

  529
  Credomp parfet oll hep Iesus oamp collet,
Hac ez oamp calet dalchet en arretaou ;
En em offret eo da meruel dre setancc
          Dre hon affancaou.

  530
  Ren a geure pell euit hon seuel ny ;
Dre meur a casty ha bout inystriet*,  [lisez injuriet] 
Bede ober offr e quic hac e crochen
          Da bout dispennet.

  531
  En un croas, a chuen, certen, en un menez,
Dre cals a truez voe finuez e dezyaou ;
Oz pernaff, chetu, pep tu natur humen
          Dre meur anqueniaou.

  532
  Dont a gray, credet, goude fet an bet man,
Da barn pep unan, heny glan ne mano ;
Ha goude respont pep diouz e bontez,
          Rez en deuezo.

  533
  Oll supplyomp ten he mam dre pedennou,
Pan serrimp guenaou, ma hon pardono laouen ;
Ha, dre e merit, ut det nobis vitam
          Aeternam
Amen

Vous êtes ici

Livre

Nouelou ancien (an) (44) : XLIII – Iesus Roue’n effaou a so deuet ouz traou man

Nouelou ancien (an)

association Daskor Breizh
06.11.32.35.32.
36, rue Basse,
29600 Morlaix