Nouelou ancien (an) (23) : XXII – Nouel, Nouel, Nouel ! sant Gabriel, Eal Doue
* Edition par Théodore Hersart de la Villemarqué dans Revue Celtique, XII, pp. 20 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650

Nouel voar ton Quand l’empereur de Rome arriva dans Paris, ou Marseille la iolie

  291
Nouel, Nouel, Nouel ! sant Gabriel, Eal Doue,
A deuez a pen queffridy bete Mary diffoue.
Hep brut he saludas, maz lauaras, tra bras voe,
Ez deuzye en Ytron eil Person hac hon Roue.

  292
Hy en em humilias pan cleuas an drase,
Mas comsas cuff hac vuhel dan Eal pan revele :
« Me so matez Jesus ! Gratius ha yoayus cre

Joul Doue, Roue’n nouar ! Eff a goar ma oll doare. »

  293
Dre an mister anterin so diuin en Dryndet,
Ez deuez glan en Rouanez Maestres an guercheset
Map Doue voar an douar, hon guir car a Nazaret,
Euyt scler dyseren lignez humen a penet.

  294
Pan voa ha corff hac eneff Doue an enff conceuet,
Mary en dougas dinam, ne deffoue blam en bet.
Pan voa entr’en bedys pen an nao mys fournysset

Ez ganas Roue’n nouar, ioa en douar preparet.

  295
En un merchaucy dyfflas, en presep un asen,
Pan voant en nos reposet, ez voe ganet voar fouen ;
Quen guele n’en deffoue Roue’n anaffon, dre hon pen ;
Hac enff en lech teffal entr’en chatal eualhen.

  296
Pan voa deuet Jesus buhan voar an bet man ganet,
An Aelez glan a canas hac a quemennas net
Ez oa ganet Roue’n mor, gant enor, dan Pastoret :
« Jesu an guir buguel ; tut santel, deuet de guelet. »

  297
Dre an sclerder an steren ez voe cren quelennet
An Rouanez Orient en ho hent, enten[t]et ;
Maz dygacsont offranc ha forz chevancc avancet
Euyt proff da Jesus haetus dre craciustet.

  298
Allas ! entromp, pecheryen, n’on euz souten en bet
Quement hac an goar Mary; dezy supply bepret ;

Hon Maestres, mam Jesus, gracius hon excuset

Maz ahimp oll ouz Knech pe en lech ez eux iechet.

Vous êtes ici

association Daskor Breizh
06.11.32.35.32.
36, rue Basse,
29600 Morlaix