Nouelou ancien (an) (18) : XVII – Quenomp Nouel da Roue’n Aelez gant feiz…
* Edition par Théodore Hersart de la Villemarqué dans Revue Celtique, XI, pp. 46 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650

Nouel voar ton Urbs beata Hierusalem

  222
Quenomp Nouel da Roue’n Aelez gant feiz ha carantez pur !
Ganet eo sur gant eür mat hegarad un crouadur
Gant un Merch scler so preservet a pep pechet, bezet sur.

  223
En drouc stat dre pechet Adam ez oamp dre un tam blammet
Da bout en hyruout hep souten, en Ifern ien, en penet,
En desir en Mary guirion han eil Person da donet.

  224
Pemp mil blizien ancquen a voe oz gortoz Doue enouet ;
Beb maz maruent ez eant dan tan buhan gant Sathan poaniet ;
Iesu so deuet, lamet hon crim, maz omp an lim redimet.

  225
Vn Guerches hep fent, ententit, credit, dre humilite
Jesus an eff a conceuffas a paeas en croas hon dle ;
Dezy an Eal a reuelas gant un joa bras an dra se.

  226
An nativite a Jesus so maruaillus dreyst musur :
Conceuet Guerch gant un merch mat a perz Doue’n Tat, crouadur,
En he guerchdet glan ez manas pan ez ganas, me hoz assur.

  227
Quentaff guele en deffoue Doue un presep voue, ne voue quen ;
Ganet en douar gant Mary en coz ty, merchaucy ien
Entr’en mylet, ententet, voue, hac enff hon Roue, Doue ha den.

  228
Maz deuez yuez an Aelez mat dereat an Barados
Bete Doue ha den rac enep en un presep oz repos,
Da meuliff Roue’n Tron deboner, dyouz an aer, da hanter nos

  229
Quen buhan en enff e queffuer ez scauas scler un steren
Euyt reiff certes testeny hon Doue ny gant Mary guen,  [certes / certen] 
Maz deuez bet enn y an Try Roue da proff da Doue Roue an glen.

  230
Dr’en Aelez glan ez voe canet dan Pastoret — caezret tra !
Da Doue enor ha jolory ha da Mary Gloria ;
Dan Mabic bihan ez canent hac ouz Roue’n sent ez grent joa.

  231
Deuet eo Jesu da bout humen hac[a] ancquen don prenaff ;
Entr’en Juzeuyen dre ho penn en croas pren e astennaff,
Hac euid omp garo ez maruas, poan a souffras an brasasff.

  232
Greomp enor ha gloar da Mary ha meuleudy an muyhaff ;
Entromp requetomp, pedomp hy mar plig gaty suppliaff
Jesu Map Doue, guir Roue an Tron, e Leon don pardonaff.

  Amen !

Vous êtes ici

association Daskor Breizh
06.11.32.35.32.
36, rue Basse, 29600 Morlaix