Nouelou ancien (an) (05) : IV – Quenomp cuff vuhel Nouel da Roe’n velly
* Edition par Théodore Hersart de la Villemarqué dans Revue Celtique, X, pp. 1 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650

Nouel voar ton Courtes itroneset

  57
Quenomp cuff vuhel Nouel da Roe ’n velly
Ha dinam de mam chuec, choantec, hep dieguy ;
          He deueus, n’en deux sy,
          Ganet Doue hon Roue ny ;
          Desy ez voe bryet,
          Gant an Eal revelet.

  58
Jesu Map Doue Roue ’n sent ganet en paourentez,
Da quifin an nos man en deffoue bihanes,
          Ryou difflas ha lastez ;
          Entren loeznet, vetez,
          Rouen Aelez, gouezet,
          So deomp breman ganet.

  59
Ouz e gourtos en bet ny hon boue caleter ;
Hac a voe pemp mil bloas ha choaze* annoazder,  [lisez choaz e] 
          Pan pligas gant Rouen ster
          Cacs e map, hep goap, quer,
          Da bezaf* merzer querhaff,  [lisez bout] 
          An lim don redymaff,

  60
Henoaz hep annoaz quet pan voa net ganet Doue,
En un lech dyabry, en un merchaucy voe ;
          Dre on pechet, credet, voe ;
          Songet plen pez enuoe
          Jesu Map Doue ha den,
          Deuet en noaz don dazpren !

  61
An Eal a reuelas gant joa bras hac asquet
Bezaff ganet Roue ’n mor a cor dan pastoret ;
          An menez, gouezet,
          Peur vuhell de guelet
          Ez int deuez*, na gret y,  [lisez deuet] 
          Bete clouar Mary.

  62
Ne guelat nep amser, a scler, quen bras steren
Euel a diouz an ploue maz edoa Doue Roue ’n glen,
          Maz deuez scaff canauen
          Eno, a dyouz e pen :
          Pep cren a goulenne
          Max oa net ganet Doue.

  63
Neuse, en un croashent, hep fent, gant larguentez,
Eno en em caffas glan buhan an Rouanez,
          Oz clasq splan an annez
          Jesu dre meur truez,
          Guyrionez, gouezet,
          Maz oa’n Map man ganet.

  64
En un tremen dre* bro ez quefsont Herodes,  [lisez dren (dre’n)] 
Hac o cuffias y a deffry alyes,
          A do grat, mat hac aes,
          Ho tretas a tra spes,
          Certes dre courtesy,
          Hac enff claff gant auy.

  65
— « Sentyt, distroit aman, an hent man, Rouanez,
Pan tremenhet doz bro ha moz logo vetez. » 
          Maz diougansont fez
          Donet dy en dyvez :
          « Me gray rez, emezaff,
          Ambuig do dystrugaff ».

  66
Neuse, pan distrosont e quefsont, a conter,
Cannat Doue diffoue net, an Eal mat, hep atfer :
          « Deuet an hent man dan queer ;
          Rac Herot, so noter,
          So esper commeret
          Syouas ! maz vech lazet. »

  67
Ouz an lyt ententyt escuyt, ne sonnyt guer ;
Pan eo ganet Map Doue, hon Roue hac hon Crouer
          En un ty so dister
          Ha hep tan en maner :
          Pebez austelery
          Da Map Doue hon Roue ny !

  68
Roue’n Aelez, gouezet, so deuet voar an bet man
Adal maz voe ganet bepret ouz compret poan ;
          Dre Adam voue ’n dra man
          Maz oump condamnet glan
          Da bout en tan manet
          Bizuiquen en penet.

  69
Mary, mam Doue ha din den, a yez certen, m’en cret,
Davede Symeon, den guiryon raesonet ;
          Hac ez roas dezaff net
          He mabic beniguet
          Dan eiz dez, gouezet
          Goude glan bout ganet.

  70
Aman dan goar Mary ez voe profecyet 
Ez treusse clezev don he calon estonnet, 
          Hac enff a scuilse net 
          E goat pur assuret : 
          Rac palamour deomp ni
          Ez voue crucifiet.

  71
Neuse splan gant an Eal ez voue cre revelet
Techet cre en Egypt da vezaff acuytet,
          Rac cren gourchemennet
          Voa, syouaz ! ez lazset
          (Oz clasq caffout Roe ’n sent)
          An oll inoçantet.

  72
Vileny hiny bras peur dyfflas ha lastez
En deffoue da consent Roue’n sent ha paourentez :
          N’en deffoa lem bemdez
          Nemet poan, bihanez !
          An doa truez bezaff
          Map Doue ’n Tat en stat man ?

  73
Seys bloaz en annoazien*, en anquen ha penet  [lisez annoaz ien] 
Ez vyont en Egypt quen bezaff acuytet ;
          Gant an Eal revelet
          Deze y, hep muy quet,
          Voe donet, credet lem,
          Adarre en Bezleem.

  74
Faziaff quentaff pret, goude monet cret lem,
A gresont y reall en creys Hierusalem ;
          Ha, dr’en foul, oz goulen
          Maz e doa Doue, Roue ’n glen,
          Maz viont quelennet
          De caffout hep dout quet.

  75
En creys an auditor, e mesq an Doctoret.
Ez disputeve* creff hac enff no douge quet ;  [lisez dispute eff] 
          Leun voa plen a quenet
          A squiant, ententet ;
          Da pen he daouzec bloaz,
          Ho geureunnaz et zo*.  [lisez Ho geureu annoazet]

  76
Cacs he map de abry gant y ha he priet
A geureu Mary fur neuse pur, assuret,
          Hep mar oz lauaret :
          « A chuy na gouzye quet
          Ez oamp oz hoz clasq plen,
          En anquen ha penet ? »

  77
Iesu Map Doue Crouer a scler hep dyfferancç
Hon prenas e pep guys dre guyr obeyssancç.
          Voar an oll tut prudancç
          So enn aff quentaff lancç ;
          Voar pep noeancc lancet ;
          Roue ’n Aelez, gouezet.

  78
Tut deuot ha notabl, hep comps goap na fablaou,
Ouz an lyt songyt frez a dyuez da dezraou
          Hep faut hon guir Autraou
          A gouzaffas hasaou
          Poanyaou ha gloasaou quer
          Han marv yen, dez guener.

Vous êtes ici

association Daskor Breizh
06.11.32.35.32.
36, rue Basse, 29600 Morlaix