Barzhaz Breizh : Lez-Breizh – C'himiad (ar)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

Pa oa paotr Lez-Breizh e ti e vamm
En devoe bet ur pedeiz* estlamm :    [un deiz] 

Ur marc’heg o tonet gant ar c’hoad,
Hag eñ penn-da-benn harnezet mat.

Hag ar paotr Lez-Breizh ’dal’ m’e welas
Arvariñ ’oa Sant Mikael a reas ;

Ha war e zaoulin en em strinkas
Hag en em groazañ prim a reas.

– Aotroù Sant Mikael, en an’ Doue,
Na it ket da ober droug din-me ! –

– An Aotroù Sant Mikael ned on ket,
Nag un droug-oberour kennebeut*,    [K kennebet] 

Sant Mikael, avat, me n’am on ket ;
Marc’heg urzhet, na lavaran ket. –

– Gwelet marc’heg biskoazh n’am eus graet,
Na komzet anezho kennebeud*. –    [idem] 

– Un den eveldon an hini eo* ;    [K eou] 
’Gwelas-te unan o vont e-bioù ? –

– Leveret-hu din-me da gentañ ;
Petra se, na petra ’rit, gantañ ? –

– Pezh am eus c’hoant a dizhan gantañ ;
Ur goaf a leverer anezhañ ; –

– Gwell eo ganin, gwell eo va fenn-bazh ;
Na eer ket en he arbenn hep lazh ;

Na petra an diskell koueveur*-mañ    [kouevr] 
A zougit-hu diouzh ho prec’h amañ ? –

– Ned eo ket, mab, un diskell koueveur*,    [idem] 
Un tarzhian-gwennek e c’halver*. –    [K c’halveur] 

– Aotroù marc’heg, na’m goapeit ket ;
Meur a wenneg tarzhet ’meus gwelet

Derc’hel e rafe unan em dorn,
Ken ledan emañ hag ur maen-forn.

Na peseurt dilhad a zo ganeoc’h ;
Ken pounner hag houarn, pounneroc’h. –

– Ul lereg houarnet eo ivez
Da’m difenniñ deus taolioù kleze. –

– Ma ve ’n heizez evel-se sternet,
Diaesoc’h e vijent da dizhet.

Hogen, aotroù, leveret din-me,
Ha ganet emaoc’h bet evel-se ? –

Ar marc’heg kozh, evel m’e glevas,
A-walc’h e galon c’hoarzhin a reas.

– Piv, an’ diaoul ’ta, en deus ho sternet
Ma ned oc’h bet evel-se ganet ? –

– An hini en deus gwir da ober,
Hennezh en deus graet, va mabig ker. –

– Ha piv ’neus bremañ gwir da ober ? –
– Den nemet an aotroù kont Kemper.

Lavar ivez an taol-mañ din-me ;
’Gwelas-te un den eveldon-me ? –

– Un den eveldoc’h am eus gwelet :
Ha dre-se tre, aotroù, emañ aet. –

association Daskor Breizh
06.11.32.35.32.
36, rue Basse,
29600 Morlaix