Barzhaz Breizh : Kloareg Rohan (6)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

– Aotroù beleg, din livirit*,    [leveret] 
Er c’hastell petra ’peus gwelet. –

– Me am eus gwelet ur c’hlac’har
Mar zo bet biskoazh war zouar ;

Gwelet ur verzherez am eus,
Hag he merzherier ’vont gant keuz. –

– Aotroù beleg, din livirit*,    [idem] 
Er c’hoazhent petra ’peus gwelet ? –

– Ur c’hagn a welis dizolo,
Ha chas ha brini war he zro. –

– Petra ’peus gwelet er vered,
Da sklêrder al loar, ar stered ? –

– Un itron wenn en he c’hoazez
A welis war ur bez nevez,

Ur mabig koant war he barlenn,
Toullet treuz-didreuz e gerc’henn,

A-gostez dehoù ur c’hi-red gell*,    [K giall] 
Ur marc’h gwenn-kann a-gostez all :

An eil e c’houzoug kontellet,
Egile treuzet e vruched ;

Hag o fennoù a astennent,
Hag he daouarn flour a lipent ;

Hag hi a-youl-vat, tro-e-tro,
A rae allazik dezho.

Hag he mab, dre van gwarizi,
A rae allazik dezhi ;

Ken a eas al loar da guzhet,
Ha netra mui n’am eus gwelet ;

Nemet klevet an eostig-noz
A gane gwerz ar baradoz. –

association Daskor Breizh
06.11.32.35.32.
36, rue Basse,
29600 Morlaix