Barzhaz Breizh : Eostig (an)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

Gwreg yaouank a Sant Malo, dec’h,
D’he frenestr a ouele, d’an nec’h :

– Siwazh ! siwazh ! me zo tizhet !
Va eostig paour a zo lazhet ! –

– Livirit din, va gwreg nevez,
Perak ’ta savit ken lies,

Ken lies diouzh va c’hostez-me,
E-kreiz an noz, diouzh ho kwele,

Diskabell-kaer ha diarc’hen,
Perak ’ta savit evel-henn ? –

– Mar savan, den ker, evel-se,
E-kreiz an noz, diouzh va gwele,

Da eo ganin, setu, gwelet
Al listri bras mont ha donet. –

– Ned eo ket, ’vat, evit ul lestr,
Az it ken lies d’ar prenestr ;

Ned eo ket evit al listri,
Nag evit daou nag evit tri ;

Ned eo ket evit o gwelet,
Kennebeut al loar, ar stered.

Va itron, din-me livirit,
Da berak bep noz e savit ! –

– Sevek a ran da vont da sell
Ouzh va bugel en e gavell. –

– Ned eo ket ken evit sellet,
Sellet ouzh ur bugel kousket ;

Ned eo ket gevier a fell d’e.
Da berak savit evel-se ? –

– Va denig kozh, ma na daerez,
Me ’lavaro ar wirionez :

Un eostig a glevan bep noz,
Er jardin war ur bodig roz ;

Un eostig bep noz a glevan ;
Ken gae e kan, ken dous e kan !

Ken dous e kan, ken kaer, ken flour*,    [L flor] 
Bep noz, bep noz, pa sioul ar mor ! –

An aotroù kozh ’dal m’he c’hlevas,
En e galon a brederias ;

An aotroù kozh ’dal m’he c’hlevas,
En e galon a lavaras :

– Pe mar ’mañ gwir, pe ma n’eo ket,
An eostig a vezo paket ! –

Antronoez beure, pa savas,
Da gaout ar jardinour ez eas.

– Jardinour mat, sentit ouzhin ;
Un dra zo a ra glac’har din :

Er c’harzh a zo un eostig-noz
Ne ra nemet kanañ en noz ;

’Hed an noz ne ra ’met kanañ,
Ken emañ ’on dihunet gantañ.

Mar ’mañ paket fenoz ganit,
Ur gwenneg aour a roin-me dit. –

Ar jardinour p’en deus klevet ;
Un ulmennig en deus stennet,

Hag an eostig en deus paket,
Ha d’e aotroù ’neus ker kaset.

Hag an aotroù, pa hen dalc’has,
A-walc’h e galon a c’hoarzhas,

Hag e vougas, hag e daolas,
War barlenn wenn an itron gaezh*.    [L geas] 

– Dalit, dalit, va gwreg yaouank ;
Setu amañ hoc’h eostig koant ;

Me ’meus her paket evidoc’h ;
’Michañs, va dous, e plijo deoc’h. –

He den yaouank ’dal ma klevas,
Gant glac’har vras a lavaras :

– Setu ma dous ha me tizhet ;
Ne c’hallfomp mui en em welet,

Da sklêrder loar, d’ar prenester*,    [prenestr] 
’Vel ma oamp boazet da obet. –

association Daskor Breizh
06.11.32.35.32.
36, rue Basse,
29600 Morlaix