Barzhaz Breizh : Bran (4)
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

Hag an itron a c’houlenne
Gant ar gêriz pa zouare :

– Petra nevez a zo amañ
Pa glevan ar c’hleier ’tiñsañ ? –

Un den kozh en deus lavaret
D’an itron p’en deus he c’hlevet ;

– Ur marc’heg paket oa amañ,
Mervel en deus graet en noz-mañ. –

’Oa ket e gomz peurlavaret,
An itron d’an tour zo pignet.

En ur redek, o ouelañ ken,
Dispak-kaer ganti he blev gwenn.

Ken a oa ’r gêriz souezhet,
Souezhet-bras oc’h he gwelet,

Gwelet un itron zivroad
Oc’h ober kañv ’hed ar straed.

Ken a lavare pep unan :
– Piv eo houmañ, hag a-beban ? –

An itron baour a lavare
Da dreuzier an tour, pa errue :

– Digor, digor, prim an nor din !
Ma mab ! ma mab ! ra e welin ! –

Pa oa digoret an nor vras,
War gorf he mab en em strinkas ;

Hag e vriataat a reas,
Ha biken goude na savas.

Livre

Barzhaz Breizh : Bran (4)

Barzhaz Breizh

association Daskor Breizh
06.11.32.35.32.
36, rue Basse,
29600 Morlaix