Barzhaz Breizh : Aotroù Nann hag ar Gorrigan
* Nous avons modernisé l’orthographe selon le standard peurunvan, mais nous avons respecté les tournures d’origine (et notamment les mutations et les particules verbales).

An aotroù Nann hag e bried
Yaouankik-flamm ’oent dimezet,
Yaouankik-flamm dispartiet.

An itron he deus ganet dec’h
Daou vugel ken kaer hag an erc’h ;
Unan zo paotr, an all zo merc’h.

– Petra ’c’houl’ ho kalon avat,
P’hoc’h eus ganet ur mab d’e dad ?
Livirit, m’her rey deoc’h timat :

Kig kefeleg a stang an diaz,
Pe kig karv ar forest c’hlas ? –

– Kig karv eo a gavfen mat ;
Hogen poan ’vezo mont d’ar c’hoad. –

An Aotroù Nann pa he c’hlevas,
En e c’hoaf derv a grogas,

Ha war e varc’h du a lammas,
Ha d’ar forest c’hlas ez eas.

War lez ar c’hoad pa oa degou’et,
Un heizez wenn en deus gwelet ;

Hag eñ mont buan war he zro
Ken ’grene ’n douar dindano ;

Hag eñ mont war he lerc’h raktal,
Ken ’rede an dour diouzh e dal,

Ha diouzh e varc’h a bep kostez,
Ken a zeuas an abardaez ;

Ken a gavas ur wazh vihan
E-kichen ti ur Gorrigan*,    [benel] 

Ha tro-war-dro un dachenn flour ;
Hag eñ da ziskenn d’evañ dour.

Ar Gorrig oa ’tal e feunteun
O kribañ he blev hir melen,

Hag o c’hribe gant ur grib aour
(’N itronezed-se n’int ket paour.)

– Penaos ’out-te ken dievezh
Da zont da strafuilhañ va gwazh* !    [L gwezh] 

Dimeziñ din bremañ ’refet,
Pe e-pad seizh vloaz e sec’hfet ;
Pe a-benn tri deiz e varvfet.

– Dimeziñ deoc’h me na rin ket,
Rak ur bloaz zo ’on dimezet ;

Da zisec’hiñ na chomin ket,
Na ’benn tri deiz na varvin ket ;

Na varvin ket a-benn tri deiz,
Nemet pa vezo youl Doue ;

Met gwell eo din mervel bremañ
’Get dimeziñ d’ur Gorrigan ! –

– Va mammig kaezh, ma am c’harit*,    [L c’haret] 
Aozit va gwelet ma n’eo ket ;
Gant ar c’hleñved ez on dalc’het.

Na livirit tra da’m fried,
A-benn tri deiz ez vin beziet :
Gant ur Gorrigan ’on ket skoet. –

Hag a-benn tri devezh goude,
Ar c’hwreg yaouank a c’houlenne :

– Livirit din-me, va mamm-gaer,
Ha perak e son ar c’hleier ?

Perak e kan ar veleien
War al leur-zi, gwisket e gwenn ? –

– En noz-mañ mervel en deus graet
Ur paourkaezh hor boa kemeret. –

– Va mamm-gaer din-me livirit*,    [L leveret] 
Va aotroù Nann pelec’h eo aet ? –

– E kêr, va merc’hig, ez eo aet ;
E-berr e teuio d’ho kwelet. –

– Va mamm-gaer gaezh livirit din,
Ruz pe c’hlas d’an iliz ez in ? –

– Va merc’hig deuet eo ar c’hiz
Da vont gwisket e du d’an iliz. –

Pazenn ar vered pa dreuzas,
Bez he fried paour a welas.

– Pera hon dud-ni zo marvet,
Pa deo hon douar-ni fresket ? –

– Siwazh ! va merc’h, n’hallan nac’h mui :
Ho pried paour a zo enni ! –

War he daoulin en em strinkas,
Ha biken goude na savas.

Burzhudus ’vije da welet,
An noz goude ma oa laket
An itron e bez he fried,

Gwelet div wezenn derv sevel
Diouzh ho bez nevez d’an uhel ;

Ha war o brank div c’houlmig wenn,
Hag i ken drev ha ken laouen,

Eno ’kanañ da c’houloù-deiz,
Hag o nijal d’an neñv goude.

Livre

Barzhaz Breizh : Aotroù Nann hag ar Gorrigan

Barzhaz Breizh

association Daskor Breizh
06.11.32.35.32.
36, rue Basse,
29600 Morlaix