Livre V, fable III

      Peskig a vezo pesk kaer
            Nemet ma’z en do buhez ;
         Met, da c’hortoz, e leusker
      Pa vez tapet, zo follentezh ;
      Rak d’e adtapout n’oc’h ket sur.

      Ul lusennig, c’hoazh krouadur,
            A oe paket gant ur gwaz.
            E[ñ], gant hast ha plijadur,
            E baner a zigoras.
      Kement-mañ zo, eme an den,
      Komañsamant a fritadenn.
      Al lusennig, en e langaj,
            A lavar : va list da vont :
      N’az pezo na koll na domaj.
            N’on mat da netra, erfont ;
      Da hirañ tout, ur genaouad.
      List ac’hanon c’hoazh ur pennad ;
      Lez ac’hanon c’hoazh da greskiñ.
      Pa vin savet, sur e c’helli
            Tapout ac’hanon-me c’hoazh
            Ha va gwerzhañ ur priz bras.
      Hag ho pe kant eus va fouez-me,
      Peseurt pladad a ve hennezh ? –
      Peseurt plad ? ’me ar pesketaer.
      Peskig, c’hwi zo ur sermoner.
      Na mui na met, pesk va mignon,
      Emberr, er bilig, gant ognon,
      E viot fritet, kredit se ;
      Rak skoed en dorn a dalv din-me
      Muioc’h eget daou o vale.