daskor - facebook  daskor - css

Daskor

E gortoz

Genre
Roman
Langue
Breton
Source
Redon, Imprimeries Réunies, A. Bouteloup et fils aîné, 1913
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

Paourkaezh Katellig !…  An aerouant a zo deuet war da dro da’z touelliñ evel ma teuas gwechall da douelliñ ho tud kentañ e Baradoz an douar ! Mar o divije gouezet Adam hag Eva petra ’yoa oc’h o gedal goude o fec’hed ! Mar o divije gwelet holl boanioù o bugale vihan, ar c’hleñvedoù, an torfedoù, ar marv !… Ya, buan o divije troet kein da Baolig, ha lavaret dezhañ mont da… vale. Paourkaezh Katellig ! Mar he divije bet anaoudegezh eus poanioù a bep seurt an darn vuiañ eus ar re a ya da Bariz diwar ar maez ! Mar he divije gellet gwelet en a-raok kement a yae da c’hoarvezout ganti…he divije kaset ar brizh vreizhadez-se da… vale gant he lizhiri touellus ha gaouiad.

Met, siwazh ! an den a zo graet evel-se, n’en em blij ket el lec’h m’emañ ; c’hoant en deus da gaout gwelloc’h, ha morse ne gav dezhañ en deus e walc’h.

Lizhiri a yeas hag a deuas c’hoazh eus ar Barizianez d’ar Vreizhadez hag eus ar Vreizhadez d’ar Barizianez. Katellig a yoa gouenezet gant houmañ, evel ma vez seizhet al labour gant selloù ar sparfell, pe an touseg gant an naer.

Mont a ranke da dañva soubenn Pariz[.]

    Plac’hig yaouank, perak ’ta tec’hel
    Pell dimeus da vamm ha da dad ?
    Perak kuitaat da vro Breizh-Izel,
    El lec’h ’out evurus ha mat ?…

        Ankoua ar c’hêrioù,
        Gant o falz-madoù ;

Enno ’lec’h madoù e kavfes trubuilhoù.

    O chom e bro da gavell !
    Chom, chom e Breizh-Izel !

    Kas pell diouzhit ar soñj divalo
    En deus trubuilhet da spered,
    Chom bremañ da vevañ en da vro,
    Enni ’z po levenez bepred !

        Lavar eveldon,
        A-greiz da galon,

Ma klevo Breizhiz hor c’han kaer ha gwirion :

    Chomomp e bro hor c’havell !
    Chomomp e Breizh-Izel !! (ar Yeodet)

Dont a ra em spered ur son savet n’eus ket c’hoazh pell bras evit lavaret ivez da dud Breizh chom er gêr. Vat a raio marteze da veur a hini, ha plijadur da gement hini a gar e vamm-vro Breizh-Izel hag he feiz.